تەك ەر ادامداردىڭ عانا كىرۋىنە رۇقسات ەتىلگەن كوپتەگەن عيبادات كەشەندەرى ورنالاسقان جاپون ارالى وكينوسيما يۋنەسكو-نىڭ بۇكىلالەمدىك مۇرا نىساندارىنىڭ تىزىمىنە ەنگىزىلدى، دەپ حابارلايدى قامشى اقپاراتتىق اگەنتتىگى moya-planeta.ru-عا سىلتەمە جاساپ.
وكينوسيما ارالى فۋكۋوكا پرەفەكتۋراسىنىڭ وڭتۇستىك باتىسىندا ورنالاسقان. ونداعى كوپتەگەن عيبادات كەشەندەرىندە جاپونيانىڭ ۇلتتىق قۇندىلىعى سانالاتىن 80 مىڭنان استام كونە جادىگەرلەر ساقتالعان. بۇل ارالعا ايەلدەر قاۋىمىنىڭ كىرۋىنە رۇقسات ەتىلمەيدى.
ەر ادامداردىڭ ءوزى جىلىنا ءبىر-اق رەت، 27 مامىر كۇنى ارالدا ءدىني فەستيۆال وتكىزىلگەندە كىرەدى. وكينوسيمانى ءبىر ۋاقىتتا 200 ادام عانا كورە الادى جانە ولاردىڭ ارالعا بارعاندىعى تۋرالى بايانداۋعا نەمەسە ارالدان قانداي دا ءبىر زات الىپ شىعۋىنا قاتاڭ تىيىم سالىنعان. قالعان ۋاقىتتىڭ بارىندە 700 شارشى مەتردى قامتيتىن وكينوسيمادا ءبىر عانا موناح ءومىر سۇرەدى.
شولۋشى: ايگەرىم تاۋباي
