ەكىباستۇزدا بەس قاباتتى ءۇيدىڭ ءۇش بولمەلى پاتەرىندە ءورت شىعىپ 76 جاستاعى ايەل جاراقاتتانىپ، تاعى ءۇش زەينەتكەر ەۆاكۋاسيالاندى، دەپ حابارلايدى قامشى اقپاراتتىق اگەنتتىگى pavlodarnews.kz مالىمەتىنە سۇيەنىپ.
وبلىستىق ءتجد-نىڭ باسپا ءسوز قىزمەتى حابارلاعانداي، كەشە 16:04 مينۋتتا كەزەكشى بولىمگە ءورت تۋرالى حابارلاما كەلىپ تۇسكەن.
- ءورت گورنياكوۆ كوشەسى، 19 مەكەنجايىندا ورىن الدى. 15 شارشى مەتر قىزىل جالىننىڭ استىندا قالدى. ءۇش ادام ەۆاكۋاسيالانىپ، ەكى ادام قۇتقارىلدى. 16:26 مينۋتتا وت ءوشىرىلىپ، 16:40 مينۋتتا ءتىلسىز جاۋ تولىقتاي اۋىزدىقتالدى. 1941 جىلى تۋعان ايەل ادام گازبەن ۋلانىپ، اۋرۋحاناعا جەتكىزىلدى. ءورتتىڭ سەبەبى مەن شىعىنى انىقتالۋدا، - دەدى تجد.
شولۋشى: ايگەرىم تاۋباي
