قازىرگى تاڭدا يمامداردىڭ جالاقىسى قايىرىمدىلىقتان تۇسكەن قاراجاتقا تىكەلەي بايلانىستى، دەپ حابارلايدى قامشى اقپاراتتىق اگەنتتىگى Sputnik.kz سايتىنا سىلتەمە جاساپ.
ءدىن سالاسىنداعى ماڭىزدى ماسەلەلەردى شەشۋ ءۇشىن ارنايى كورپوراتيۆتىك قايىرىمدىلىق قورى قۇرىلدى. بۇل تۋرالى ۇكىمەت وتىرىسىندا ق ر ءدىن ىستەرى جانە ازاماتتىق قوعام ءمينيسترى نۇرلان ەرمەكبايەۆ ءمالىم ەتتى.
"ەلباسىنىڭ تاپسىرماسىنا سايكەس ارنايى كورپوراتيۆتىك قايىرىمدىلىق قورى قۇرىلدى. ول ادىلەت مينيسترلىگىندە تىركەلدى. بۇل قوردىڭ باستى ماقساتتارى — مۇسىلماندىق جانە باسقا دا كوزدەردەن تۇسەتىن قايىرىمدىلىق قاراجاتتى جيناقتاۋ، الەۋمەتتىك تۇرعىدان از قامتىلعان جانە وسىل توپتارعا كومەك بەرۋ، قايىرىمدىلىقتان تۇسكەن قارجىنى جانە تاپقان تابىستى زايىرلى ماقساتتارعا باعىتتاۋ"، — دەپ ءمالىم ەتتى ەرمەكبايەۆ.
تاعى دا ءبىر وتە ماڭىزدى باعىت - يمامداردى قامتاماسىز ەتۋ. ءمينيستردىڭ ايتۋىنشا، قازىرگى تاڭدا يمامداردىڭ جالاقىسى قايىرىمدىلىقتان تۇسكەن قاراجاتقا تىكەلەي بايلانىستى. ەگەر ۇلكەن قالالاردا يمامداردىڭ جاعدايى سالىستىرمالى تۇردە ءبىرقالىپتى بولسا، اۋدان ورتالىقتارى مەن شالعاي ەلدى مەكەندەردە ولاردىڭ جاعدايى وتە تۇراقسىز.
"وسى جاعداي يمامداردىڭ ەل اراسىنداعى يميدجىنە نۇقسان كەلتىرەدى. سەبەبى بۇل جايتتى دەسترۋكتيۆتى ءدىني اعىم وكىلدەرى پايدالانادى، يمامداردى مۇقاتىپ، ولارعا جاماعاتتى قارسى قويىپ، ىرىكتى سالۋ ارەكەتتەرىن جاساۋدا.
جالپى، ءبىلىم مەن بىلىكتىلىگى جوعارى يمامداردى ءدىني تۇرعىدا پروبلەمالى ايماقتارعا تارتۋ جانە شالعاي ەلدى مەكەندەرگە قىزمەت اتقارۋعا جىبەرۋ وتە قيىن بولىپ كەتتى. رەسپۋبليكا بويىنشا 150-دەن استام مەشىتتە يمام مۇلدەم جوق. باسقالارىندا اۋىسۋ فاكتىلەرى ءجيى كەزدەسەدى. بۇگىن ءبىز يمامداردىڭ جالاقىسىنا تىكەلەي بيۋدجەتتەن قاراجات بولە المايمىز. سوندىقتان بۇل قور اتالعان وزەكتى ماسەلەلەردى شەشە الادى دەپ ۇمىتتەنەمىز"، — دەدى مينيستر.
قوردىڭ قۇرىلتايشىلارى - مينيسترلىككە قاراستى مادەنيەت جانە ءدىن حالىقارالىق ورتالىعى، ءدىن ىستەرى جونىندەگى عىلىمي-زەرتتەۋ تالداۋ ورتالىعى جانە ءدىنتانۋشىلار كونگرەسى. قوردىڭ قامقورشىلار كەڭەسى دە جاساقتالىپتى. ولار قوردىڭ اشىقتىعىن قامتاماسىز ەتەتىن بولادى.
"قامقورشىلار كەڭەسىندە پارلامەنت دەپۋتاتى، باس ءمۇفتي، قارجى مينيسترلىگى، مەملەكەتتتىك قىزمەت ىستەرى جانە سىبايلاس جەمقورىققا قارسى ءىس-قيمىل اگەنتتىگى، "اتامەكەن" كاسىپكەرلەر پالاتاسى، "استانا" حالىقارالىق قارجى ورتالىنىڭ وكىلدەرى جانە بەلگىلى قوعام قايراتكەرلەرى بار. كەڭەس ءتوراعاسى ءدىن سالاسىنداعى وكىلەتتى ورگاننىڭ جەتەكشىسى بولىپ تابىلادى.
سونىمەن بىرگە، قوردىڭ القالىق اتقارۋ ورگانى، باسقارمانىڭ ءتوراعاسى مەن القا مۇشەلەرى سايلاندى. ءدىن سالاسىنىڭ جانە قوردىڭ ماقساتتارىنىڭ ماڭىزدىلىعىن ەسكەرە وتىرىپ، بارلىق ءدىن سالاسىنا جانى اشيتىن ادامداردى جانە كاسىپكەرلەردى، ۇيىمداردى قوردى قولداۋعا شاقىرامىن"، — دەدى مينيستر.
