الاشوردا كوسەمدەرىنىڭ ءبىرى جاھانشا دوسمۇحامەدوۆتىڭ ماسكەۋدەگى بۋتوۆو پوليگونىندا جەرلەنگەنى بەلگىلى بولدى، دەپ جازادى قامشى اقپارات اگەنتتىگى.

قازاقپاراتتىڭ مالىمەتىنە سۇيەنسەك، بۇل تۋرالى الاشوردا قوزعالىسىنىڭ 100 جىلدىعىنا وراي جىمپيتى-ماسكەۋ باعىتىندا ۇيىمداستىرىلعان ەكسپەديسيا مۇشەسى، باتىس قازاقستان يننوۆاسيالىق-تەحنولوگيالىق ۋنيۆەرسيتەتىنىڭ پروفەسسورى، تاريح عىلىمدارىنىڭ كانديداتى دامەتكەن سۇلەيمەنوۆا ءمالىم ەتتى.

ونىڭ ايتۋىنشا، بۋتوۆو بۇرىن قالانىڭ شەتىندە بولسا، ءقازىر ماسكەۋدىڭ ىشىندە قالعان. مۇندا التى ۇلكەن قورىمدا ساياسي قۋعىن-سۇرگىن جىلدارى جازىقسىز اتىلعان 20761 ادام جەرلەنگەن. وسىنداعى عيباداتحانانىڭ باسشىسى كيريلل كالەدا اكەي رەسەي ۇكىمەتىنىڭ قولداۋىمەن 1997 جىلدان بەرى تىنباي ەڭبەكتەنىپ، بۋتوۆو پوليگونىندا جەرلەنگەن مىڭنان استام ساياسي قۋعىن-سۇرگىن قۇرباندارىنىڭ ءاتى-جونىن انىقتاپ، بىرنەشە كىتاپ شىعارعان. سونىڭ 3-تومىنىڭ 82-بەتىندە ج.دوسمۇحامەدوۆ تۋرالى دا مالىمەت بەرىلگەن. ياعني 1938 جىلى 3 تامىز كۇنى اتىلعان 120 ادامنىڭ ىشىندە جاھانشا دا بار. بۋتوۆوداعى قىرعىن 1937 جىلى 8 تامىزدا باستالىپ، 1938 جىلدىڭ قاراشاسىنا دەيىن جالعاسقان. مايىتتەردى قالاي بولسا سولاي كومە بەرگەن. مىسالى، 12 شارشى مەتردىڭ جەردىڭ وزىنەن 149 ادامنىڭ سۇيەگى شىققان.

«قازىرگى كەزدە بۋتوۆو پوليگونىنداعى ءمارمار تاقتاعا وسىندا قۇربان بولعانداردىڭ اتى-جوندەرى جازىلۋدا. وسى ءمارمار تاقتادا جاھانشا دوسمۇحامەدوۆتىڭ ءاتى-جونى، اتىلعان كۇنى تولىقتاي جازىلعان. ولار جاھانشانىڭ كىم ەكەنىن بىلمەسە دە، تىزىمگە كىرگىزگەن. بۋتوۆوداعى قورىمعا ەلدەن اپارعان ءبىر ۋىس توپىراقتى سالدىق. ءبىر ۋىس توپىراقتى الىپ كەلدىك. ماسكەۋ ساپارىندا سونداي-اق 1906-1910 جىلدارى جاھانشا ءبىلىم الىپ، زاڭگەر ماماندىعىن الىپ شىققان عيماراتتا (ءقازىر مۇندا م.لومونوسوۆ اتىنداعى ممۋ-دىڭ فيليالى ازيا جانە افريكا ەلدەرى ينستيتۋتى ورنالاسقان)، دوسمۇحامەدوۆتەر وتباسى تۇرعان ۇيدە، الاشوردا كوسەمى ءاليحان بوكەيحانوۆ جەرلەنگەن دون زيراتىندا بولدىق. العان اسەرىمىز مول، كەيىنىرەك تولىق جازاتىن بولامىز»، - دەدى الاشتانۋشى دامەتكەن سۇلەيمەنوۆا.