ەكسپو-2017 حالىقارالىق كورمەسى باستالعالى بەرى ءتۇرلى داۋ-دامايلار مەن ءار ءتۇرلى مازمۇنداعى پىكىرلەر جيىلەپ كەتكەنى راس. ونداعى قىزىقتار مەن ولقىلىقتار، سونىمەن قاتار جەتىستىكتەر جايىندا كوزىمەن كورگەن ادامداردىڭ بارلىعى دا جارىسا جازۋدا. ال مىنا جاعداي، ءتىپتى، ەلدە بولماعان وقيعا بولدى.
ەكسپو كورمەسى ءوتىپ جاتقان ايماققا كەز كەلگەن ادام ارنايى اككرەديتاسيادان ءوتىپ، كۋالىك جاساتۋى قاجەت. بۇل – كەز كەلگەن اۋقىمدى ءىس-شارادا قالىپتاسقان ءۇردىس. ال، جانۋارلار شە؟.. ەكسپو كورمەسىنە ەندى جانۋارلار دا ارنايى كۋالىك جاساتىپ كىرۋى قاجەت ەكەن. وعان ايگۇل يبرايەۆا ەسىمدى جەلى قولدانۋشىسىنىڭ جازعان جازباسى دالەل بولا الادى.
«استاناداعى ەكسپو كورمەسىندە وتەتىن شوۋعا 4 تۇيە اكەلىنگەن بولاتىن. الايدا، ەكسپو ايماعىنا ءوتۋ ءۇشىن اككرەديتاسيادان ءوتىپ، ارنايى كۋالىك جاساتۋ قاجەت ەكەن. ولاي بولماعان جاعدايدا ەسىكتە تۇرعان كۇزەتشى كىرگىزبەي قويادى. اككرەديتاسيا بولماسا ول تۇيە مە، الدە باسقا ما – قىزىقتىرمايدى ەكەن، ەڭ باستىسى اككرەديتاسيا بولۋ كەرەك.
كەيىننەن اككرەديتاسيا جاسايتىن ورتالىققا حابارلاسىپ كورىپ ەدىك، ءبىر قىز «اككرەديتاسيادان ءوتۋ ءۇشىن كوزىلدىرىكسىز 3ح4 سۋرەت، انفاس جانە دە ءارتىستىڭ تولىق ءاتى-جونى قاجەت» - دەپ جاۋاپ بەردى. سۋرەتتى كورىپ ارى قاراي نە بولعاندىعى بەلگىلى شىعار... الايدا، ازداپ قۋلىق جاسادىق، ءبىر تۇيەنى عانا سۋرەتكە ءتۇسىرىپ الىپ، بارلىعىنا سول سۋرەتتى جابىستىردىق»، - دەپ جازادى وقيعا كۋاگەرى ايگۇل يبرايەۆا ءوزىنىڭ جەكە پاراقشاسىندا.
