62 جاستاعى مۇحاممەد بزيك اتتى كاليفورنيا تۇرعىنى ايىقپاس دەرتكە شالدىققان جانە تۋىستارى تاستاپ كەتكەن بالالاردى اسىراپ الادى. 20 جىلدىڭ ىشىندە ول 80 شاقتى بالانى ءوز قاناتىنىڭ استىنا الىپ وسىرگەن. ونىڭ 6 جاستاعى وگەي قىزى كوزى كورمەي جانە قۇلاعى ەستىمەي تۋعان، سونىمەن قاتار ميى دا دامىماي قالعان، دەپ حابارلايدى قامشى اقپاراتتىق اگەنتتىگى Life.ru سايتىنا سىلتەمە جاساپ.

مۇحاممەد ەكى جىل بۇرىن قايتىس بولىپ كەتكەن ايەلىنىڭ باستاعان ءىسىن ءومىرىنىڭ سوڭىنا دەيىن جالعاستىرۋعا ۋادە ەتكەن. ول ايىقپاس دەرتكە شالدىعىپ، تاعدىر تالكەگىنە تۇسكەن بالالارعا قامقورلىق جاساپ، ولاردىڭ جاقسى ءومىر سۇرۋىنە جاعداي جاسايدى، ءوزىنىڭ بار ماحابباتىن توگەدى.

مۇحاممەدتىڭ بالاسىنىڭ ءوزى «كريستالدى ادام» دەرتىنە شالدىققان. ال مۇحاممەدتىڭ ءوزى وتكەن جىلى وتا جاساتىپ، قاتەرلى ىسىكتەن ارىلعان ەكەن. ول وتا جاساتار الدىندا ءدال وسى بالالار سەكىلدى بويىن قورقىنىش جايلاعانىن ايتادى. «اۋرۋحانا توسەگىندە جاتقان كەزىمدە ول بالالارعا راسىمەن دە قولداۋ مەن قامقورلىق كەرەك ەكەندىگىن ءتۇسىندىم»، - دەيدى ول.

مۇحاممەد 20 جىلدىڭ ىشىندە 80-نەن استام بالالاردى اسىراپ العان، الايدا 10 بالاسى قازا تاۋىپتى. كوپتەگەن بالالاردى اسىراپ العان كەزىندە ولاردىڭ ەسىمى دە بولماعان  جانە ولار اتا-انا مەيىرىمى دەگەندى بىلمەگەن.

«بالالار وزدەرىن كەرەكسىز سەزىنبەۋلەرى قاجەت. ءومىردىڭ ءمانى – وزىڭنەن السىزدەرگە كومەكتەسۋدە»، - دەيدى مۇحاممەد. 

شولۋشى: نازەركە لابيحان