2017-2018 وقۋ جىلىنا ارنالعان مەملەكەتتىك ءبىلىم بەرۋ تاپسىرىسىنىڭ كولەمى ءوستى، دەپ حابارلايدى قامشى اقپاراتتىق اگەنتتىگى قازاقپاراتقا سىلتەمە جاساپ.

«2017-2018 وقۋ جىلىنان باستاپ، سوڭعى 5 جىل ىشىندە العاش رەت جوعارى جانە جوعارى وقۋ ورنىنان كەيىنگى ءبىلىمى بار كادرلاردى دايارلاۋعا ارنالعان مەملەكەتتىك ءبىلىم بەرۋ تاپسىرىسىنىڭ كولەمى ءوستى. اتاپ ايتقاندا، 2017-2018 وقۋ جىلىنا باكالاۆرياتقا - 37932 گرانت ءبولىندى، بۇل وتكەن جىلعى مەملەكەتتىك تاپسىرىس كولەمىمەن سالىستىرعاندا 6 مىڭعا كوپ.  ماگيستراتۋراعا - 10004 ورىن ءبولىندى، وتكەن جىلعا قاراعاندا بۇل كورسەتكىش 2،5 مىڭنان استام ورىنعا كوبەيگەن. ال PhD دوكتورانتۋراعا - 1285 ورىن ءبولىندى، بۇل وتكەن جىلعى ورىن سانىنان ەكى ەسەگە كوبىرەك»، - دەپ جاۋاپ بەردى ق ر ءبىلىم جانە عىلىم مينيسترلىگىنىڭ باسپا ءسوز قىزمەتى.

«2017-2018 وقۋ جىلىنا ارنالعان ماماندىقتار بولىنىسىندە جوعارى جانە جوعارى وقۋ ورنىنان كەيىنگى ءبىلىمى بار مامانداردى دايارلاۋعا مەملەكەتتىك ءبىلىم بەرۋ تاپسىرىسىن ءبولۋ تۋرالى» ق ر ءبىلىم جانە عىلىم مينيسترلىگىنىڭ بۇيرىعى شىلدە ايىنىڭ ەكىنشى جارتىسىندا جاريالانادى.

مينيسترلىكتىڭ حابارلاۋىنشا، مەملەكەتتىك ءبىلىم بەرۋ تاپسىرىسىن بولۋدە پەداگوگيكالىق، تەحنيكالىق جانە الەۋمەتتىك، قىزمەت كورسەتۋ سالالارىنىڭ ماماندىقتارىنا باسىمدىق بەرىلەدى.