تۇركىمەنستاننىڭ مەملەكەتتىك تەلەارنالارى مەن راديو ستانسيالارى بۇدان بىلاي بيۋدجەتتەن قارجىلاندىرىلمايدى، دەپ حابارلايدى Qamshy.kz اقپارات اگەنتتىگى centralasian.org مالىمەتىنە سۇيەنىپ.

تۇركىمەنستان پرەزيدەنتىنىڭ 7 شىلدە كۇنگى جارلىعىنا سايكەس، تەلەراديو حابار تاراتۋ جانە كينەماتوگرافيا جونىندەگى مەملەكەتتىك كوميتەت شارۋاشىلىق ەسەپكە اۋدارىلعان. 2018 جىلدان باستاپ بۇل سالانى مەملەكەتتىك قازىنادان قارجىلاندىرۋ بىرتىندەپ توقتاتىلادى.

ۇكىمەتتىڭ شەشىمى بويىنشا، تەلەراديو حابار تاراتۋ جۇيەسى جارناما ارقىلى تۇسكەن تابىستان ءوز شىعىندارىن وزدەرى جابادى.

قازىرگى ۋاقىتتا تۇركىمەنستاندا مەملەكەتتىك "التىن اسىر"، "ياشلىك"، "ميراس"، "تۇركىمەنستان"، "اشحاباد"، "تۇركىمەن وۆازى" "تۇركىمەنستان سپورت" دەپ اتالاتىن 7 تەلەارنا جانە "چار تاراپدان"، "ميراس"، "وۆاز" جانە "ۆاتان" دەپ اتالاتىن 4 راديو كانال جۇمىس ىستەيدى. بۇلاردىڭ ءبارى مەملەكەت تاراپىنان قارجىلاندىرىلادى.

تۇركىمەنستاننىڭ مەملەكەتتىك تەلەارنالارىنداعى باعدارلامالاردى ەل پرەزيدەنتى قازىرگى دامۋعا سايكەس كەلمەيدى دەپ بىرنەشە رەت سىناعان.

شولۋشى: ايگەرىم تاۋباي