ەلوردالىق «استانا ارلاندارى» كومانداسى «كۋبا قابىلاندارىنا» قارسى وتەتىن بۇكىلالەمدىك بوكس سەرياسىنىڭ WSB جوباسى بويىنشا فينالدىق كەزدەسۋى الدىندا جۋرناليستەر مەن جانكۇيەرلەر ءۇشىن اشىق جاتتىعۋ وتكىزدى، دەپ حابارلايدى qamshy.kz.

فينالدىق كەزدەسۋ 15 ءشىلدى كۇنى استانا قالاسىندا وتەدى. 75 كەلىدە ءابىلحان امانقۇلدىڭ جاراقاتىنا قاراماي جەكپە-جەككە شىعاتىنىن جانە بۇل كەزدەسۋگە قاتىساتىن «ارلاندارمەن» ولاردىڭ قارسىلاستارىنىڭ ءتىزىمىن جاريالاعان بولاتىنبىز.

الدا وتەتىن قيانكەسكى شايقاس جايلى بەلگىلى اقىن، سپورت ءجۋرناليسى تابيعات ابايلدايەۆ تومەندەگىدەي بولجامىن جاسادى.

بۇل «استانا ارلاندارى» 2 دۇركىن چەمپيون بولعان ساتتەگى قۇرام. ەسەپ 6:4 بولعان. وسى جولى دا جەڭىستىڭ تۋىن جەلبىرەتەتىن مۇمكىندىك مول.

الداعى  سەنبىدە قولعاپ تۇيىستىرەتىن 49 كەلىدەگى تەمىرتاس ءجۇسىپوۆ 2015 جىلى ارگيلاگوستى 3:0 ەسەبىمەن تالقانداعان (50:45،50:45،50:45)؛ تاعى دا قايتالاۋى كەرەك؛

 52 كەلىدەگى ولجاس ساتتىبايەۆ يوسباني ۆەيتيانى 3:0 ەسەبىمەن وڭاي ۇتقان (49:46،49:46،49:46)؛ تاعى دا قايتالاۋى كەرەك؛

 56 كەلىدەگى قايرات ەرالييەۆ روبەيسي راميرەسكە 1:2 ەسەبىمەن ەسە جىبەرگەن. بيىل ءىلياس سۇلەيمەنوۆ حاۆەر يبانەسپەن قولعاپ تۇيىستىرەدى.

 60 كەلىدەگى زاكىر سافيۋللين لازارو الۆارەستەن ەسە قايتارۋعا تىرىسادى. ەكى جىل بۇرىن زاكىر بۇل سەريادا بىرنەشە رەت ۇتىلسا، بيىل قارسىلاستارىن قيراتىپ كەلەدى، ياعني، ءوسۋ، وركەندەۋ بار.

 64 كەلىدەگى ءدىلمۇرات ءمىجيتوۆتان دا ءۇمىت كۇتەمىز. ەندي كرۋز ءسوزسىز مىقتى. قازاق بالاسى دا قاراپ قالماۋى كەرەك. ويتكەنى 2 جىل بۇرىن باشەنوۆ تولەدونى ۇتقان بولاتىن؛

 69 كەلىدەگى سىرالعى قارسىلاستار اسلانبەك شىمبەرگەنوۆ پەن سوتولونگا تاعى دا توبەلەسەدى. اسلان تاعى دا ۇتسا دەيمىز؛

 75 كەلىدەگى ءابىلحان امانقۇل مەيىرىم نۇرسۇلتانوۆتىڭ جەڭىستى جورىعىن قايتالاۋعا قاۋقارلى. مەيىرىم الەم چەمپيونى (كەيىننەن وليمپيادا چەمپيونى اتاندى) ارلەن كاردوندى تىزە بۇكتىرگەن. ءابىلحان داڭقتى قارسىلاسىن ۇتسا، اتاعى دۇركىرەيدى؛

 81 كەلىدە شانس 25:75 لا كرۋز وتە ايلاكەر. ءبىراق ارمان رىسبەك ءوزىن دالەلدەۋ ءۇشىن بارىن سالادى دەگەن ويدامىز.

 91 كەلىدە انتون پينچۋك تە ايانبايدى. ەكى جىل بۇرىن كەتكەن ليەۆيتتىڭ ەسەسىن قايتارۋعا تىرىسادى. راس ليەۆيت ساۆوننان ەسەسىن وليمپيادادا قايتاردى. نۋ، پينچۋك تە ءوزىنىڭ وسال ەمەس ەكەنىن كورسەتۋى كەرەك.

 91 كەلىدەگى ولجاس بۇقايەۆ ءوزىن جاقسى جاعىنان كورسەتۋى ءتيىس دەگەن ويدامىز. كۋبا بوكسشىسىن ۇرىپ جىققان لەگيونەر حرگوۆيچتەن كەم ەمەسپىن دەگىسى كەلەتىن شىعار. دىچكو دا ۇتقان كۋبالىقتى.

قىسقاسى، ءۇش دۇركىن چەمپيون بولاتىن شانس بار. قالعانىن ۋاقىت كورسەتەر...

ۇلاربەك دالەي ۇلى