باس پروكۋراتۋراسىنىڭ قۇقىقتىق ستاتيستيكا جانە ارنايى ەسەپكە الۋ جونىندەگى كوميتەتى 2017 جىلدىڭ العاشقى جارتىسىنداعى جول اپاتتىلىعى مەن جاراقاتتانۋ جاعدايى تۋرالى مالىمەتتەردى ۇسىندى دەپ حابارلايدى قامشى اقپاراتتىق اگەنتتىگى قازاقپاراتقا سىلتەمە جاساي وتىرىپ.

كوميتەتتىڭ باسپا ءسوز قىزمەتىنىڭ حابارلاۋىنشا، 6 ايدا رەسپۋبليكا جولدارىندا 7127 جول-كولىك وقيعالارى بولعان. وندا 9992 ادام زارداپ شەگىپ، 738ء-ى قازا تاپقان. وتكەن جىلدىڭ العاشقى جارتى جىلدىعىمەن سالىستىرعاندا، جول-كولىك وقيعالارى 10،7%-كە، زارداپ شەككەندەر سانى - 10،3%-كە، مەرت بولعاندار سانى - 20،5%-كە ازايعان.

جول-كولىك وقيعالارىنىڭ باسىم كوپشىلىگى الماتى، الماتى وبلىسى جانە وڭتۇستىك قازاقستان وبلىستارىندا بولعان. ءولىم-جىتىم جاعىنان الماتى وبلىسى كوش باستاپ تۇر. ايماق جولدارىنا 162 ادام كوز جۇمعان. ەڭ ۇلكەن جول-كولىك  وقيعاسى اقتوبە وبلىسىندا تىركەلگەن، وندا 9 ادام قازا بولىپ، 16 ادام زارداپ شەككەن. «اپاتتىلىق كارتاسى» كورسەتكەندەي، الماتى قالاسىنداعى جاندوسوۆ-ماناس كوشەلەرىنىڭ قيىلىسى قازاقستانداعى ەڭ اپاتتى جول بولىگى بولىپ تانىلدى. وندا جىل باسىنان بەرى 9 جول-كولىك اپاتى تىركەلىپ، 10 ادام جاراقاتتانعان.

شولۋشى: اسەل بولات قىزى