12 شىلدەدە قازاقستاننىڭ سىرتقى ىستەر مينيسترلىگىندە «قازاقستاننان كورەيا رەسپۋبليكاسىنا زاڭسىز ەڭبەك ميگراسياسى ماسەلەسى» اتتى تاقىرىپتا بۇقارالىق اقپارات قۇرالدارىنىڭ وكىلدەرىنە كونسۋلدىق قىزمەت دەپارتامەنتىنىڭ ديرەكتورى ارداق مادييەۆ پەن كورەيا رەسپۋبليكاسىنىڭ قازاقستانداعى ەلشىسى كيم دە-سيكتىڭ بىرلەسكەن باسپا ءسوز كونفەرەنسياسى وتكىزىلدى، دەپ حابارلايدى قامشى اقپارات اگەنتتىگى.

باسپا ءسوز كونفەرەنسياسىندا ا. مادييەۆ 2014 جىلعى 29 قاراشادا كۇشىنە ەنگەن 30 كۇنگە دەيىن ۆيزالىق تالاپتاردى ءوزارا جويۋ تۋرالى قازاقستان رەسپۋبليكاسىنىڭ ۇكىمەتى مەن كورەيا رەسپۋبليكاسىنىڭ ۇكىمەتى اراسىنداعى كەلىسىمنىڭ نەگىزگى ەرەجەلەرىن بايانداپ بەردى. كەلىسىمگە سايكەس، جارامدى جول ءجۇرۋ قۇجاتتارى بار قازاقستاننىڭ ازاماتتارى ۆيزانى الدىن الا الماي تۇرىپ، كورەيا رەسپۋبليكاسىنا تەك تۋريزم، ساۋىعۋ نەمەسە ەمدەلۋ، جەكە ىستەرمەن نەمەسە ىسكەرلىك ماقساتپەن عانا كەلە الادى جانە 30 تاۋلىكتەن اسپايتىن مەرزىمدە ۆيزاسىز بولا الاتىنىن ەرەكشە اتاپ ءوتتى. كورەيا رەسپۋبليكاسىندا ەڭبەك نەمەسە ميسسيونەرلىك قىزمەتپەن اينالىسۋعا، وقۋ مەكەمەلەرىندە وقۋعا نەمەسە تۇرۋعا نيەت بىلدىرگەن ازاماتتار ءتيىستى ۆيزالاردى الۋى ءتيىس.

سونىمەن قاتار، اتالعان كەلىسىم كۇشىنە ەنگەننەن كەيىن زاڭسىز ميگراسيا جاعدايلارى جيىلەندى – كەيبىر دەرەكتەرگە سايكەس، 2017 جىلعى ماۋسىمنىڭ سوڭىنداعى جاعداي بويىنشا 5 700-گە جۋىق قازاقستان ازاماتتارى وڭتۇستىك كورەيا اۋماعىندا زاڭسىز تۇرۋدا (2016 جىلى – 3 198). قازاقستان تاراپىنان زاڭسىز ميگراسيانىڭ ۇلعايۋىن بولدىرماۋ ماقساتىندا ق ر ءسىم مۇددەلى مەملەكەتتىك ورگاندارمەن ءوز قۇزىرەتتەرى شەڭبەرىندە ءتيىستى شارالاردى قابىلداۋ ماسەلەسىن پىسىقتاۋدا.

ءوز كەزەگىندە، كيم دە-سيك قازاقستان مەن كورەيانىڭ 2009 جىلدان بەرى ستراتەگيالىق ارىپتەستەر ەكەنىن اتاپ ءوتىپ، قازاقستان ازاماتتارىن كورەياعا كىرگىزبەي كەرى قايتارۋ فاكتىلەرىن ازايتۋ ءۇشىن ءتيىستى شارالار قولدانۋدا، سونىڭ ىشىندە كەڭ اۋقىمدى ءتۇسىندىرۋ جۇمىستارى جۇرگىزىلۋدە، دەپ مالىمدەدى. سونداي-اق، ول قازاقستاندىقتاردىڭ ەلگە كىرگىزىلمەۋىنىڭ نەگىزگى سەبەپتەرىن ناقتىلادى. اتاپ ايتقاندا، كورەي كلينيكاسىنا ەمدەلۋگە بارا جاتقانىنىڭ راستالماۋى؛ تۋريستىك ماقساتتا بولسا تۋىستارى، تانىستارى نەمەسە تۋريستىك اگەنتتىكتەردىڭ كورسەتىلمەۋى، قازاقستان ازاماتتارىن كورەيادا بولعان كەزدە الىپ جۇرەتىندەر تۋرالى دەرەكتەردىڭ بولماۋى، ىسكەرلىك ءۇشىن بارا جاتقاندار ءۇشىن كورەياداعى شاقىرۋشى ۇيىمدار، ارىپتەستەر، جۇمىس جوبالارى تۋرالى دەرەكتەردىڭ نەمەسە ناقتى دالەلدەردىڭ بولماۋى جانە ت.ب.

سونىمەن بىرگە، وڭتۇستىك كورەيا ەلشىسى دەپورتاسيالانۋ قاتەرىن بارىنشا ازايتۋ ءۇشىن قازاقستان ازاماتتارىنا ۇسىنىستار بەردى. ونىڭ ايتۋىنشا، ەگەر ساپاردىڭ ماقساتى ەمدەلۋ بولسا، ەلگە كىرۋ كەزىندە اۋرۋحانا كوورديناتورى كومەگىمەن كورەي اۋرۋحاناسىندا كەپىلدەمە ارقىلى ەمدەلۋ تۋرالى راستاۋ قۇجاتتارىنىڭ بولۋى قاجەت. تۋريزم نەمەسە ىسكەرلىك ساپار جاعدايىندا، ەكىجاقتى بيلەت، قوناق ءۇيدىڭ برونى، بولاتىن (كورەتىن) جەرلەرى مەن عيماراتتاردىڭ تىزبەسى، تولەم قابىلەتتىلىگىن راستايتىن بانك شوتى جونىندەگى انىقتاما نەمەسە كرەديتتىك كارتا بويىنشا ءۇزىندى كوشىرمە قولدارىندا بولۋى ءتيىس. كورەياعا ءبىرىنشى رەت باراتىن نەمەسە بۇرىن ءبىر نەمەسە بىرنەشە رەت كورەيا اۋماعىنا كىرگىزىلمەگەن ازاماتتارعا كورەيا رەسپۋبليكاسىنىڭ استاناداعى ەلشىلىگىنە نەمەسە الماتىداعى باس كونسۋلدىعىنا جۇگىنىپ، ەلگە كەدەرگىسىز كىرۋ ءۇشىن ءتيىستى ۆيزانى الۋعا بولاتىنىن اتاپ ءوتتى.

باسپا ءسوز كونفەرەنسياسىنىڭ سوڭىندا ا. مادييەۆ پەن كيم دە-سيك جۋرناليستتەردىڭ سۇراقتارىنا جاۋاپ بەردى.

شولۋشى: گۇلىم جاقان