بيىل ابىلايحان اتىنداعى قازاق حالىقارالىق قاتىناستار جانە الەم تىلدەرى ۋنيۆەرسيتەتى تۇڭعىش اسكەري جۋرناليستەردى وقىتىپ شىعاردى، دەپ حابارلايدى Qamshy.kz اقپارات اگەنتتىگى  قازاقپارات مالىمەتىنە سۇيەنىپ. 

جوو ماماندارىنىڭ ايتۋىنشا، قازاقستاندا بۇرىن-سوڭدى مۇنداي ماماندىق بولماعان. اسكەري جۋرناليستەردى دايىنداۋ ءۇشىن 2015 جىلى العاش رەت اسكەري كافەدراعا ستۋدەنتتەر قابىلداندى. وقۋ بارىسىندا ستۋدەنتتەر ەكسترەمالدى جانە اسكەري جۋرناليستيكانىڭ، حالىقارالىق گۋمانيتارلىق قۇقىق نەگىزدەرىن مەڭگەرىپ، اسكەري تەرمينولوگيا تۋرالى ماعلۇمات الدى. جاقىندا اسكەري جۋرناليستەر ءتىپتى انت قابىلدادى. وعان دەيىن زاپاستاعى وفيسەرلەر ءۇشىن قۇرلىقتاعى اسكەردىڭ اسكەري ينستيتۋت پوليگونىندا وق اتۋدان جاتتىعۋلار ءوتتى. از كۇندە 17 ادام قورىتىندى ەمتيحان تاپسىرادى.

«جىلدا ءبىزدىڭ كافەدرانى زاپاستاعى 120 وفيسەر ءبىتىرىپ شىعادى. بيىل ونىڭ 17ء-سى - اسكەري جۋرناليستەر. مۇنداي ماماندار مەملەكەت قاجەتتىلىگىنە قاراي دايارلانادى. الەمدەگى شيەلەنىسكە تولى احۋالعا قاراپ وتىرىپ، مۇنداي ماماندىقتىڭ كەرەكتىگىن ءتۇسىنىپ وتىرمىز»، - دەدى قازاق حالىقارالىق قاتىناستار جانە الەم تىلدەرى ۋنيۆەرسيتەتى اسكەري كافەدراسىنىڭ باسشىسى رۋسلان ابەسىنوۆ.

ايتا كەتۋ كەرەك، اتالعان كافەدرادا اسكەري جۋرناليستەردەن بولەك، اسكەري اۋدارماشىلار دايارلانادى. ءبىلىم الىپ شىققان ستۋدەنتتەردىڭ باسىم كوپشىلىگى قازاقستان قارۋلى كۇشتەرىنىڭ ساپىندا قىزمەت ەتىپ كەلەدى.

شولۋشى: ايگەرىم تاۋباي