قازاقستان پرەزيدەنتى نۇرسۇلتان نازاربايەۆ ەۋرازيالىق ەكونوميكالىق وداق قۇرۋعا قاتىستى ايتىلعان سىنعا جاۋاپ بەردى، - دەپ حابارلايدى Qamshy.kz اقپارات اگەنتتىگى Tengrinews.kz-كە سىلتەمە جاساي وتىرىپ. استانادا ق ر ۇقك-نىڭ قۇرىلۋىنا 25 جىل تولۋىنا وراي وتكەن جيىندا نۇرسۇلتان نازاربايەۆ ينتەگراسيالىق پروسەستەر دامۋى مەن تمد ەلدەرىنىڭ ءوزارا قارىم-قاتىناسىنىڭ نىعايۋىنا قاتىستى ماسەلە قوزعادى.

"الەمدە ساقتالىپ قالعان تەرەڭ قايشىلىقتار حالىقارالىق قاۋىمداستىققا تۇگەلدەي سىن بولىپ وتىر. ونىڭ ىشىندە قازاقستانعا دا. جاھاندىق پروبلەمالاردى جەمىستى ترانسشەكارالىق ارىپتەستىك اياسىندا عانا شەشۋگە بولادى. قازاقستان - ەكونوميكالىق ىقپالداستىق پەن ارەكەتتەستىككە باعىتتالعان ينتەگراسيالىق پروسەستەردىڭ دامۋىن جۇيەلى جاقتاۋشىسى. مەن ەرتەرەكتە بولعان ادامگەرشىلىك، مادەني قارىم-قاتىناستاردى ساقتاۋدى قولدادىم. سوندىقتان تمد-نى نىعايتۋدى ۇسىندىم"، - دەدى پرەزيدەنت سالتاناتتى شاراعا قاتىسۋشىلاردىڭ الدىندا.

"الايدا قالاعانىمىزداي بولا قويمادى. سوسىن ءارقيلى جىلدامدىقتاعى ينتەگراسيانى ۇسىندىم، ول بويىنشا قالاعاندار تىعىز بولادى دا، قالعاندارى اسسوسياتيۆ تۇردە بايلانىسادى. سوندىقتان ەۋرازيالىق ەكونوميكالىق وداق قۇرىلدى. وسىعان بايلانىستى قانشاما سىن ەستىدىك: يمپەريا قۇرىلادى، بىرىگەدى دەدى. ولاي ەمەس! بۇل تازا ەكونوميكالىق بىرلەستىك، بارلىق ەلدىڭ مۇددەسى ءۇشىن پايدا بولدى. ارينە، وداق داعدارىس كەزىندە پايدا بولدى. كورىپ وتىرعانىمىزداي، بيىل ەۋرازيالىق ەكونوميكالىق وداق ەلدەرىنىڭ اراسىندا ساۋدا 30-40 پايىزعا ءوسىپ جاتىر. وداقتى الەۋەتتى دەپ ەسەپتەيمىن جانە تىرشىلىك ەتىپ جاتقان ۇيىم، 40-قا جۋىق مەملەكەت ارىپتەستىك ورناتقىسى كەلەتىنى جانە اسسوسياسيا قۇرعىسى كەلەتىنى دە تەگىن ەمەس"، - دەپ مالىمدەدى نۇرسۇلتان نازاربايەۆ.