ماڭعىستاۋ وبلىسىندا جۇزگە تارتا ادام ەكىنشى كۇن قاتارىنان قاشقىن ساربازدى ىزدەستىرۋدە. 21 جاستاعى سەرگەي پىحالوۆ دارىگەرلىك تەكسەرۋ كەزىندە اجەتحاناعا سۇرانىپ، سودان ۇشتى-كۇيلى جوعالعان.

ءقازىر تابان جالتىراتقان جىگىتتىڭ سۋرەتتەرى قوعامدىق ورىنداردا ءىلىنىپ، كەڭ كولەمدى ىزدەۋ شارالارى قولعا الىنعان. ودان بولەك، ءدال سول اسكەري ءبولىمنىڭ تاعى ءبىر جاۋىنگەرى قولى ءتىلىم-تىلىم بولعان كۇيى وبلىستىق اۋرۋحاناعا جەتكىزىلگەن، دەپ حابارلايدى Qamshy.kz اقپارات اگەنتتىگى كتك تەلەارناسىنىڭ مالىمەتىنە سۇيەنىپ.

بۇل جاعدايلارعا قاتىستى ءبولىم باسشىلىعى ماردىمدى مالىمەت بەرمەي وتىر. بەلگىلىسى، ەكى سارباز دا اسكەر قاتارىنا ءبىر اي بۇرىن قاراعاندى وبلىسىنان شاقىرتىلعان. ال وسىنشا جاعدايعا سەبەپ بولاتىنداي اسكەريلەر اراسىندا ەشقانداي باسارازدىق جوق كورىنەدى. اۋرۋحاناعا تۇسكەن جىگىت بولسا، قولىن دارەتحاناداعى اينادان جاراقاتتاپ الىپتى. ءقازىر ەكى جاعدايمەن دە اسكەري پروكۋراتۋرا اينالىسىپ جاتىر.

- كەزەگى كەلگەندە جەتەكشىسى ونى دارەتحاناعا دەيىن ەرتىپ اپارعان. ودان ءارى قاجەتىن وتەپ، جۋىنىپ جاتقان. شامامەن ءبىر مينۋتتان كەيىن جەتەكشىسى ەسىك اشقاندا كورگەنى مىناۋ. قابىرعاداعى اينا قۇلاعان، ول ۇستاپ قالام دەگەندە قولىن كەسىپ كەتكەن،- دەيدى 6656 اسكەري ءبولىمىنىڭ ۆزۆود كومانديرى تولەگەن باحتينوۆ.

شولۋشى: ايگەرىم تاۋباي