اسا اۋىر سالماقتاعى WBA Super، IBF، IBO بەلبەۋلەرىنىڭ يەگەرى ەنتوني دجوشۋانىڭ پروموۋتەرى ەددي حيرن Sky Sports ارناسىنا سۇقبات بەرىپ، الداعى ۋاقىتتا دجوشۋا مەن ۋكراينالىق ۆلاديمير كليچكو اراسىنداعى ەكىنشى كەزدەسۋدى ەكىنشى رەت وتەتىنىن جوسپارلاپ جۇرگەنىن ايتتى.

بۇل ەكى بوكسشى اراسىنداعى ەكىنشى كەزدەسۋ لاس-ۆەگاس قالاسىندا ءوتۋ ابدەن مۇمكىن. قازىرگى ۋاقىتتا لاس-ۆەگاستىڭ ەكى بىردەي سپورت كەشەنى – MGM Grand پەن T-Mobile Arena بۇل بوكس كەشىن قابىلداۋعا ءۇمىتتى. دەرەككوزدىڭ مالىمەتى بويىنشا، پروموۋتەر جەكپە-جەكتى 11 نەمەسە 18 قاراشادا وتكىزۋدى جوسپارلاپ وتىر.

«ءبىز لاس-ۆەگاستا ريچارد شتۋرم جانە  MGM Grand سپورت كەشەنىنىڭ قوجايىنىمەن كەزدەستىك. سونىمەن قاتار T-Mobile Arena ءىشىن ارالاپ شىقتىق. راسىندا ەكەۋى دە كەرەمەت كەشەندەر. ەكى سپورت كەشەنى دە جەكپە-جەكتى قابىلداۋعا زور نيەت ءبىلدىرىپ وتىر. مەنىڭ ويىمشا، كەلەسى اپتادا دجوشۋا مەن كليچكونىڭ ريەۆانشى قايدا وتەتىنى بەلگىلى بولادى»، – دەيدى حيرن.

ەسكە سالايىق، دجوشۋا مەن كليچكو اراسىنداعى 29 ءساۋىر كۇنى «ۋەمبلي» ستاديونىندا وتكەن كەزدەسۋ بريتاندىق بوكسشىنىڭ جەڭىسىمەن اياقتالعان ەدى. ول جەكپە-جەكتىڭ 11 راۋندىندا ەنتوني قارسىلاسىن نوكاۋتقا ءتۇسىردى.

ال T-Mobile سپەورت كەشەنى 20 مىڭ جانكۇيەرگە ارنالعان. ءدال وسى جەردە 26 تامىز كۇنى امەريكالىق كىشى فلويد مەيۆەزەر مەن يرلانديالىق كونور ماكگرەگور اراسىنداعى كەزدەسۋ وتسە، 16 قىركۇيەك كۇنى قازاقستاندىق گەنناديي گولوۆكين مەن مەكسيكالىق ساۋل «كانەلو» الۆارەس جەكپە-جەك وتكىزەدى.