كاسىپقوي بوكستا قازاقتىڭ تۋىن جەدبىرەتىپ جۇرگەن جىگىتتەر مەيىرىم نۇرسۇلتانوۆ، ماديار اشكەيەۆ جانە اسحات ۋاليحانوۆ بۇكىلالەمدىك بوكس سەرياسىنىڭ WSB جوباسى بويىنشا فينالعا شىققان «Astana Arlans» بوكسشىلارىنا ساتتىلىك تىلەدى.

«– اسسالاۋماعالەيكۋم، بارشا قازاقستاندىقتار! قازاقستان ۇلتتىق قۇراما كومانداسىنىڭ «Astana Arlans» كلۋبىنىڭ جىگىتتەرىنە 15 شىلدە كۇنى وتەتىن «Cuba Domadores» كومانداسىنا قارسى فينالدىق كەزدەسۋدە جەڭىس جانە ساتتىلىك تىلەيمىز. العا، قازاقستان! العا، «Astana Arlans»! – دەدى بوكسشىلار.

ەستەرىڭىزگە سالا كەتەيىك، مەيىرىم نۇرسۇلتانوۆ، ماديار اشكەيەۆ جانە اسحات ۋاليحانوۆ بۇرىن وسى «Astana Arlans» كومانداسىندا بىرنەشە ماۋسىم بويى تەر توگىپ، WSB جوباسى اياسىندا جەڭىمپاز اتانعان بولاتىن. ءقازىر بۇل ءۇش ازامات تا كاسىپقوي بوكسقا اۋىسىپ، جەڭىس تۇعىرىنان كورىنىپ جۇرگەن ازاماتتار.

قاپەرىڭىزگە سالايىق، 15 شىلدە، ياعني، ەرتەڭ استانا قالاسىنداعى «قازاقستان» سپورت كەشەنىندە بيىلعى جەتىنشى ماۋسىمنىڭ فينالىنا شىققان «استانا ارلاندارى» مەن «كۋبا قابىلاندارى» شارشى الاڭدا كەزدەسەدى. 75 كەلى سالماق دارەجەسى بويىنشا ءابىلحان امانقۇل جاراقاتىنا قاراماي مايدانعا شىعاتىنىن وتكەندە جازعان بولاتىنبىز.

«ارلانداردىڭ» قۇرامى مەن ولاردىڭ قارسىلاستارى جايلى ارلانداردىڭ باس باپكەرى نۇرلان اقۇرپەكوۆ تىلشىمىزگە سۇحبات بەرگەن بولاتىن.

ۇلاربەك دالەي ۇلى