الماتىدا تەك جاپون كولىكتەرىن ۇرلايتىن قىلمىستىق توپ پايدا بولعان. ءۇش ايدىڭ ىشىندە قىلمىسكەرلەر ءبىر ىقشاماۋداننان سەگىز “تويوتانى” قولدى قىلىپتى. قازىرگە دەيىن ۇرلىقشىلاردىڭ ەشبىرى قولعا تۇسپەگەن. بۇل تۋرالى Qamshy.kz اقپارات اگەنتتىگى  كتك مالىمەتىنە سۇيەنىپ حابارلايدى.

“سيگنال جۇيەسى بولعان، ءبىراق ول جۇمىس ىستەمەدى. پۋلت ارقىلى قاراعانىمدا كولىكتىڭ جابىق تۇرعانى انىق كورىنگەن. ءبىراق، تاڭەرتەڭ شىققانىمدا جوق”، – دەيدى مايگۇل مۇستافينا.

مايگۇل وسىدان سوڭ بارلىق جەرگە كولىگىنىڭ ۇرلانعانى تۋرالى حابارلامالار ءىلىپ تاستاعان. وسىدان سوڭ وعان ۇرلىق كۋاگەرلەرى ەمەس، تۋرا ءوزى سياقتى زارداپ شەككەندەر حابارلاسا باستاپتى. اقىرىندا كولىگىنەن ايىرىلعان 8 ادام دا اقساي ىقشاماۋدانىنداعى كورشى ۇيلەردە تۇراتىندار بولىپ شىقتى. ءتىپتى كولىكتەردىڭ كەيبىرى ۋچاسكەلىك پوليسيا عيماراتىنىڭ دا الدىنا قويىلعان ەكەن.

“كولىگىمدى تۇنگى ساعات ۇشتە ۇرلاپ كەتتى. ويتكەنى سول كەزدە كولىگىمنىڭ دابىل جۇيەسى ەكى رەت قوڭىراۋلاتتى. ال تاڭەرتەڭ ماشينامدى تاپپاي قالدىم”، – دەيدى ءبيبىجامال سانسىزبايەۆا.

ءبىر قىزىعى بۇل اۋداننان ۇرلانعان كولىكتەردىڭ بارلىعىنىڭ ماركاسى – “تويوتا”.

“تويوتا” – قازاقستانداعى ەڭ تانىمال اۆتوكولىك ماركاسى. ول وتە تانىمال بولعاندىقتان ونى ۇرلانعان ماشينا رەتىندە ساتۋ وڭاي. ءنومىردى وتە ءساتتى اۋىستىرىپ جىبەرەتىن ماماندار بار. ال ءبىزدىڭ ەلدىڭ پوليسياسىنىڭ ول ءنومىردىڭ جالعان نە شىن ەكەنىن انىقتايتىن مۇمكىندىگى تومەن”، – دەيدى قازاقستاننىڭ تاۋەلسىز اۆتوكولىك وداعىنىڭ ءتوراعاسى ەدۋارد ەدوكوۆ.

ازىرگە پوليسەيلەر بارلىق ارەكەتتى جاساعانىمەن، ۇرلىقشىلاردى قولعا تۇسىرە الاتىن ەمەس.

“بۇل كولىكتەردىڭ قانداي ماقساتتا ۇرلانعانىن جانە كەيىن قايدا اپارىلعانىن ءبىز مىندەتتى تۇردە انىقتايمىز. قازىرگى كەزدە جەدەل-ىزدەستىرۋ شارالارى جۇرگىزىلىپ جاتىر،” – دەدى الماتى قالالىق ءىىد رەسمي وكىلى سالتانات ازىربەك.

جىل باسىنان بەرى الماتىدا 155 كولىك ۇرلانعان. كاسىبي ۇرىلاردا كولىكتىڭ دابىل جۇيەسىن جويىپ، ونى كىلتسىز-اق اشاتىن مۇمكىندىك بار ەكەن.

“زارداپ شەكپەس ءۇشىن ءتۇرلى مەحانيكالىق مۇمكىندىكتەردى پايدالانۋ كەرەك. ياعني، ماشينانى ەلەكتر كوزىنەن جانە قۋاتتان ايىرىپ تاستاي الاتىن كولىك رولىنە قۇپيا باتىرما ورناتۋ دەگەن سەكىلدى. سونداي-اق، زاماناۋي دابىل جۇيەسى كولىكتى بۇعاتتاپ تاستايتىن مۇمكىندىك بەرەدى. ولار ۇرلاپ اكەتكەنىمەن دە قوجايىن ورناتقان جۇيەنىڭ ارقاسىندا ول كولىك ءبارىبىر جۇرمەي قالادى”، – دەيدى ەدۋارد ەدوكوۆ.

كولىكتى ۇرلىقتان ساقتاۋ ءۇشىن وعان ءجۇرىسىن قاداعالايتىن ارنايى تەتىك ورناتىپ، ماشينانى بەينەباقىلاۋ كامەرالارى بار تۇسقا قويۋ كەرەك.