حالىقارالىق بوكس ۇيىمى (IBO) رەيتينگىسىنىڭ جاڭارتىلعان نۇسقاسى جاريالاندى. جاڭارتىلعان ءتىزىم بويىنشا ءبىرىنشى ورتا سالماقتاعى WBO NABO جانە WBA Inter-Continental تۇجىرىمدارى بويىنشا الەم چەمپيونى قانات «QAZAQ» يسلام (24-0، 19 كو) 19 ساتى جوعارىلادى، دەپ حابارلايدى qamsh.kz Vesti.kz پورتالىنا سالتەمە جاساپ.

IBO-نىڭ جاڭا تىزىمىندە قانات يسلام 51ء-ىنشى ورىننان 32 ورىنعا كوتەرىلدى. جارتىلاي ورتا سالماقتاعى جاڭقوش تۇراروۆ 88ء-ىنشى ورىنعا ورنالاستى.

ال يسا اقبەربايەۆ ءۇش ساتى تومەن ءتۇسىپ، 34ء-ىنشى ورىنعا ورنالاسسا، ماديار اشكەيەۆ 99-شى ورىنمەن ۇزدىك 100 بوكسشىنىڭ اراسىنا قوسىلدى.

ايتا كەتەيىك، قازىرگى ۋاقىتتا قانات يسلام الماتى ماڭىنداعى AIBA اكادەمياسىندا جاتتىعۋ جۇمىستارىن وتكىزىپ جاتىر. وتانداسىمىز كەلەسى كەزدەسۋىن 9 قىركۇيەك كۇنى استانا قالاسىندا وتكىزەدى.

ەسكە سالايىق، قانات يسلام ءوزىنىڭ سوڭعى كەزدەسۋىن 26 مامىر كۇنى مەكسيكالىق نوربەرتو گونسالەسكە قارسى وتكىزىپ، 12 راۋندتىڭ قورىتىندىسى بويىنشا تورەشىلەردىڭ شەشىمىمەن جەڭىسكە جەتتى. ءسويتىپ، ورتا سالماقتاعى WBO NABO جانە WBA Inter-سontinental تۇجىرىمى بويىنشا چەمپيوندىق بەلبەۋلەرىن جەڭىپ الدى. قازىرگى ۋاقىتتا وتانداسىمىزدىڭ ەنشىسىندە 24 كەزدەسۋ بار جانە بوكسشىمىز ونىڭ بارلىعىندا جەڭىسكە جەتكەن. 19 كەزدەسۋدە ول قارسىلاستارىن نوكاۋتقا جىبەرگەن.