حالىقتىڭ قاشاندا قۇقىق قورعاۋ سالاسىنىڭ قىزمەتكەرلەرىنە كوڭىلى تولمايدى. كۇنىنە قالالىق پوليسەيلەرگە 4 مىڭنان استام قوڭىراۋ تۇسسە، ولاردىڭ مىڭنان استامى راستالىپ جاتادى ەكەن. دەگەنمەن، الماتىدا ءبىر تاۋلىكتىڭ ىشىندە 100-گە دەيىن قىلمىستىق وقيعالار ورىن الادى. ال ىشكى ىستەر دەپارتامەنتىنىڭ مالىمەتى بويىنشا، بيىل كورسەتكىشتەر جاقسارىپ، قىلمىس سانى ازايدى دەپ وتىر. دەگەنمەن، بۇزاقىلىق، جەڭىل دەنە جاراقاتتارىن سالۋ، توناۋدىڭ كورسەتكىشتەرى تىيىلماي تۇرعان كورىنەدى. اسىرەسە، ۇيالى تەلەفون ۇرلىعى. بىلتىردىڭ وزىندە ەل كولەمىندە 100 مىڭنان استام قول، قالتا تەلەفونى قولدى بولعان. تۇرعىنداردىڭ تىنىشتىعىن بۇزاتىن بۇزاقىلىقتىڭ الدىن الۋ ءۇشىن تاعى ءبىر باعدارلاما ىسكە قوسىلماق، دەپ حابارلايدى Qamshy.kz اقپارات اگەنتتىگى.

قالادا 97 مىڭنان استام بەينە باقىلاۋ كامەرالارى قويىلعان. «ءقاۋىپسىز قالا»، «ءقاۋىپسىز اۋلا» سىندى باعدارلامالار اياسىندا 87 مىڭداي كامەرا ورناتىلعان. اۆتوماتتى قۇرىلعىلاردىڭ كومەگىمەن بيىل 529 قىلمىستىق ءىستى اشۋعا مۇمكىندىك تۋسا، تەك 11 مىڭنان استام ورىن العان اكىمشىلىك تارتىپسىزدىك تىركەلگەن. كوشەدەگى كامەرەلار ارقىلى جول ەرەجەسىن بۇزعان 10 مىڭ جۇرگىزۋشىگە ايىپپۇل جۇكتەگەن.

«الماتى قالاسىندا ورىن العان قىلمىستىڭ سانى ەداۋىر ازايعان بولاتىن. 7،5 %-عا تومەندەپ وتىر جانە دە ورىن العان قىلمىستاردىڭ دەڭگەيى دە ارتىپ وتىر. بۇل قۋانتارلىق جاي. بۇگىنگى تاڭدا، الماتى پوليسياسى بارلىق جاڭا تەحنولوگيالاردى، مۇمكىندىكتەردى پايدالانىپ قىلمىسقا توتەپ بەرۋگە مۇكىندىگى بار. مىسالى، قاراقشىلىق شابۋىلداردىڭ كورسەتكىشى 20 %-عا، ادام توناۋدىڭ كورسەتكىشى 13%-عا تومەندەدى»،- دەدى ءىىد رەسمي وكىلى سالتانات ازىربەك.

ءبىراق قالتاداعى ءاميان مەن قول تەلەفوندى قاعىپ كەتۋ كوبەيىپ تۇر. ەندى الداعى اپتادان باستاپ قوعامدىق كولىكتەردىڭ كىرە بەرىسىنە بەينەباقىلاۋ ورناتىلادى. پيلوتتىق جوباداعى العاشقى اۆتوبۋسقا ورناتىلعان كامەرا ارقىلى ءبىر اپتادا 3 ۇرلىقشى ۇستالعان. قالالىق پوليسەيلەر جان-جاقتى جاساعان جۇمىستىڭ ناتيجەسىندە اۋىر قىلمىس سانى بيىل 37،6 پايىزعا، ورتاشا بۇزاقىلىق 4،9 پايىزعا ازايدى دەيدى.

«بيىل 4074 قىلمىس تىركەلسە، بىلتىر اۋدانداعى قىلمىس سانى 4571 بولعان. ياعني، كورسەتكىش 10 پايىزعا ازايدى. اۋداندا 141 اۋىر قىلمىس بولدى. بىلتىر 378-گە جەتكەن. توناۋ 13، وزگەنىڭ مۇلكىن يەمدەنۋ 2،6، پاتەر ۇرلىعى 68، بۇزاقىلىق 58، الاياقتىق 28 پايىزعا تومەندەدى»،- دەدى مەدەۋ اۋداندىق ءىىب باسشىسى ەسەن ىسقاقوۆ.

قالا بويىنشا قىلمىستىڭ كوپ ورىن الۋى جاعىنان اۋەزوۆ اۋدانى الدا تۇر. جەر كولەمى شاعىن، نەگىزىنەن اۋقاتتىلار تۇراقتاعان مەدەۋ اۋدانى دا ۇرلىق، قاراقشىلىق جاعىنان العاشقى ۇشتىكتە. رەسمي مالىمەت ىشكى ىستەر ورگاندارى قىزمەتكەرلەرىنىڭ جۇمىسىن جوعارى باعالاپ، قىلمىس سانى ازايدى دەسە، قوعامدىق كەڭەستىڭ باعاسى بۇل پىكىرگە كەرەعار.

«حالىق اراسىندا جۇرگىزىلگەن ساۋالناما ناتيجەسىندە تۇرعىنداردىڭ 44 پايىزى جەرگىلىكتى پوليسەيلەر پارا الادى دەپ مالىمدەدى. سونداي-اق، مەدەۋ اۋدانى ىشكى ىستەر ءبولىمىنىڭ قىزمەتكەرلەرى تۇرعىنداردى بوپسالاۋ جاعىنان قالادا ءبىرىنشى ورىن الادى. وسى ۋاقىتقا دەيىن جەرگىلىكتى پوليسيانىڭ 188 قىزمەتكەرى جاۋاپكەرشىلىككە تارتىلعان»،- دەدى قالالىق قوعامدىق كەڭەستىڭ مۇشەسى  الەكساندر بەلياوۆ.

كوپ قاباتتى ۇيلەردى ورتالىق كۇزەت دابىلىنا قوسۋ الىدە كوبەيمەك. قالاداعى 111 مىڭنان استام عيمارات تۇراقتى كۇزەتكە الىنسا، اۆتوماتتى كۇزەتكە قوسىلعان جەرلەر توناۋ وقيعاسىن 44 پايىزعا دەيىن ازايتۋعا مۇمكىندىك بەرگەن. قالاداعى ەكى ميلليونداي حالىقتىڭ تىنىشتىعىن كۇزەتۋگە تاۋلىگىنە 3 مىڭداي پوليسيا جۇمىس ىستەسە، كۇنىنە شامامەن 100 دەن استام قىلمىس تىركەلەدى ەكەن.