استانادا كاراتە-دودان جاسوسپىرىمدەر مەن ەرەسەكتەر اراسىنداعى قۇرلىقارالىق بىرىنشىلىك مارەسىنە جەتتى. قازاقستان قۇراماسى جارىستىڭ ۇزدىك ۇشتىگىنە ەندى، دەپ حابارلايدى Qamshy.kz اقپارات اگەنتتىگى استانا اكىمدىگىنىڭ مەديا ورتالىعىنا سىلتەمە جاساپ.

قازاقستان قۇراماسىنىڭ قورجىنىندا 8 التىن، 6 كۇمىس جانە 13 قولا مەدال بار. جاسوسپىرىمدەر اراسىندا چەمپيوندىق ستاتۋسقا سوفيا عاليمزيانوۆا (54 كگ دەيىن)، اسەل قاناي (59 كگ دەيىن)، سوفيا بەرۋلتسيەۆا (59 كگ دەيىن)، دۋلات مامىر (70 كگ دەيىن) جانە نۇرتىلەس تىنىسبەك (76 كگ) قول جەتكىزدى.

21 جاسقا دەيىنگى ساناتتا جەڭىسكە ءمولدىر جاڭبىرباي جەتتى. ەرەسەكتەر اراسىندا التىندى ەلىمىزدىڭ اتىنان توكيو-2020 وليمپياداسىنا قاتىساتىن باستى ۇمىتكەر، ازيا ويىندارىنىڭ التىنىن العان اقتوبەلىك اندرەي اقتاۋوۆ يەلەندى. اقتىق باسەكەدە ول يراندىق حاسساننيادەلام مادجيدتتەن ۇپاي سانىمەن باسىم ءتۇستى.

قازاقستاننىڭ ەڭ رەيتينگتى كاراتيستى رينات ساعىندىقوۆ چەمپيوندىق ستاتۋسىن ساقتاپ قالا المادى. فينالدا ساۋد ارابياسىنان كەلگەن قارسىلاسىنا جول بەرىپ، قۇراما قورجىنىنا كۇمىس اكەلدى.

ەل قۇراماسىنىڭ تاعى ءبىر كوشباسشىسى چەمپيونات التىنىنا قول جەتكىزە المادى. دانيار يۋلداشيەۆ 84 كەلىگە دەيىنگى سالماقتا اقتىق باسەكەدە جاپوندىق يجيزۋكە ماسايامەن كەزدەسىپ، ازيا چەمپيونى اتاعىن ۋىسىنان جىبەرىپ الدى. جارىس قورىتىندىسى بويىنشا كۇمىستى قانجىعالادى.

19 التىن مەدالمەن يراننان كەلگەن كاراتيستەر ازيا بىرىنشىلىگىنىڭ كوشباسشىسى اتاندى. جالپى كوماندالىق ەسەپتە 16 التىنمەن جاپونيا قۇراماسى ەكىنشى ورىننان تابىلسا، قازاقستاندىق قۇراما ءۇشىنشى ساتىدان كورىندى.

ايتا كەتەيىك، 2016 جىلى حالىقارالىق وليمپيادا كوميتەتى كاراتە-دونى 2020 جىلعى وليمپيادا باعدارلاماسىنا ەنگىزدى. چەمپيوناتتا جينالعان ۇپايلار سپورتشىلاردىڭ ءتورت جىلدىق باستى ويىندارىنا ليسەنزيا الۋ كەزىندە ەسكەرىلەدى.