اتاقتى ستيۆەن حوكينگتىڭ تارازدىق ءىزباسارى 14 جاستاعى يسااك مۋستوپۋلو مۇمكىندىگى شەكتەۋلى بالالارعا كومەك كورسەتەتىن «ينديگو» جوباسىن ىسكە اسىرۋدى جوسپارلاپ وتىر، - دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساي وتىرىپ.

ول بۇل تۋرالى ەكسپو كورمەسىندەگى شۆەيساريا پاۆيلونىندا وتكەن «ادامزات كىتاپحاناسى» اتتى
ءىس-شارا بارىسىندا ايتتى. «ارنايى سىنىپتار اشۋ - بۇل ءبىزدىڭ ءستيلىمىز ەمەس. ەگەر ءبىز وقشاۋلانا بەرەتىن بولساق، وندا  جاعدايدى  ودان ءارى قيىنداتاتىن بولامىز. ەگەر ءبىزدىڭ قوعام مۇگەدەك ادامدار تۋرالى پىكىرىن وزگەرتەتىن بولسا، بىزدە دامىعان باسقا ەلدەردەن كەم ەمەس جۇيە قالىپتاسادى. ەڭ جاقىن دوسىم مەنى وزىمەن تەڭ دارەجەدە كورەدى. باسقالار دا سونداي بولعانىن قالايمىن. مەنى نازاربايەۆ ۋنيۆەرسيتەتىنەن باسقا بىردە-بىر جوو وقۋعا قابىلدامايتىندىعىن جاقسى بىلەمىن. سوندىقتان دا مەن «ينديگو» اتتى ماڭىزدى جوبانى جاساپ جاتىرمىن. ءقازىر پەداگوگيكا ماماندارى اراسىندا ىرىكتەۋ جۇرگىزىلۋدە كەيىن ولار تيۋتور بولىپ جۇمىس جاسايدى»، - دەدى يسااك مۋستوپۋلو.

ايتا كەتەتىن بولساق، تيۋتور اعىلشىن تىلىنەن اۋدارعاندا ەرەكشە پەداگوگيكالىق لاۋازىم دەگەن ماعىنانى بىلدىرەدى.

«تيۋتور - ول پەداگوگيكالىق ءبىلىمى بار ءوزىن-وزى وقىتقان ادامدار.  بىزدە سەمينارلار، ترەنينگتەر بولادى. تيۋتور ۇيگە كەلىپ كومەك كورسەتپەيدى، ول بالاعا تۇسىنىكسىز بولعان كەزدە عانا كومەككە شاقىرىلادى. ءسويتىپ ول بالالاردىڭ ءوزىن دامىتىپ، قوعامعا بەيىمدەلۋىنە اتسالىسادى. مەن وسى جوبانىڭ جۇزەگە اسىرۋىنا بار كۇشىمدى سالامىن»، - دەپ اتاپ ءوتتى ول.

سونداي-اق دارىندى تارازدىق كەمبريدج ۋنيۆەرسيتەتىنىڭ پروفەسسورى، اعىلشىننىڭ اتاقتى عالىمى ستيۆەن حوكينگپەن  كۇزدە كەزدەسەتىندىگى جايلى ايتتى. ەسكە سالا كەتەيىك، سال اۋرۋىنا شالدىققان يسااك تاراز قالاسىنداعى №13 مەكتەپتە وقيدى. ءبىراق، سىرقاتىنا قاراماستان ول 2015 جىلى وقۋشىلار اراسىنداعى ۇلتتىق يننوۆاسيالار كونكۋرسىنىڭ ارنايى سىيلىعىنا يە بولدى. سودان بەرى يسااكتى قازاقستاننىڭ تۇكپىر-تۇكپىرى، ءتىپتى، شەنەۋنىكتەر دە تانىپ، بىلە باستادى. سول كەزدە ينۆەستيسيالار جانە دامۋ مينيسترلىگىن باسقارعان اسەت يسەكەشيەۆ تە يسااكپەن تانىسىپ، ونىمەن تۇسكەن سۋرەتىن بۇكىل الەۋمەتتىك جەلىگە تاراتقان بولاتىن.