شقو-دا داۋىل كەزىندە ۇستىنە شاتىر قۇلاپ كەتكەن 82 جاستاعى شەريازدان يسانوۆ قايتىس بولدى، - دەپ حابارلايدى Qamshy.kz اقپارات اگەنتتىگى Tengrinews.kz سايتىنا سىلتەمە جاساپ. ول اۋىر جاراقات الىپ، جانساقتاۋ بولىمىندە جاتقان ەدى. 

شەريازدان يسانوۆتىڭ ءولىمى جايلى تۋىستارى ەستىرتتى.

"اتا دۇنيەدەن ءوتتى، كەشە جۇرەگى شىدامادى"، - دەدى قاريانىڭ نەمەرەسى ءازيز.

قالالىق اۋرۋحانانىڭ وكىلدەرى ناۋقاستىڭ ءولىمىن راستادى. دارىگەرلەردىڭ ايتۋىنشا، اۋىر جاعدايدا جاتقان تىل ارداگەرى كەشكى 22.00-دە قايتىس بولعان. ونىڭ سىنعان جەرى كوپ بولعان جانە كەۋدەسى تىلىنگەن. مارقۇمنىڭ تۋىستارى بۇل وقيعادا كىمنىڭ كىنالى ەكەنىن انىقتاۋعا نيەتتى.

سونىمەن قاتار، شقو تجد وكىلدەرى تۇرعىنداردىڭ داۋىل تۋرالى ەسكەرتۋ بولمادى دەپ ايىپتاعانىنا بايلانىستى پىكىر ءبىلدىردى. 

"الدىن الا، جەكسەنبىدە، تۇستەن كەيىنگى ۋاقىتتا "قازگيدرومەت" مالىمەتىنىڭ نەگىزىندە قۇتقارۋشىلار ۇيالى قوسىمشا مەن ۆەدومستۆونىڭ رەسمي سايتى ارقىلى 17 شىلدەدەگى اۋا رايى جايلى حالىققا ەسكەرتۋ جاسالدى، ەسكەرتۋدە جەلدىڭ سەكۋندىنا 20 مەتر جىلدامدىقپەن سوعۋى مۇمكىن ەكەنى ايتىلدى. بۇل مالىمەت اۋا رايىنا سايكەس بولدى ما، جوق پا - بۇل ماسەلەنى تجد-عا ەمەس، سينوپتيكتەرگە قويۋ كەرەك"، - دەدى تجد وكىلدەرى.

ەسكە سالايىق، كەشە شىعىس قازاقستان وبلىسىندا داۋىل تۇرعان ەدى. وسكەمەندە جۇلىنىپ كەتكەن شاتىر كولىكتەردىڭ ۇستىنە تۇسكەن، جەلدەن جارناما قۇراستىرمالارى قيراپ، ايالدامالار مەن اعاشتاردى قۇلاتقان. داۋىل 10-15 مينۋتتاي ۋاقىت بولعان. الەۋمەتتىك جەلىلەردەگى حابارلامالارعا قاراعاندا، ءوڭىردىڭ بارلىق جەرىندە دە تۇرعىندار جەلدىڭ بولعانىن ايتىپ وتىر. قولدانۋشىلار قۇلاعان اعاشتار، قيراعان ايالدامالار جانە بۇلىنگەن كولىكتەردى سۋرەتكە جانە ۆيدەوعا ءتۇسىرىپ، رەداكسياعا جولدادى. كەيىن داۋىلدان بەس ادامنىڭ زارداپ شەككەنى بەلگىلى بولدى.