ءال-فارابي اتىنداعى قازۇۋ-دا ستۋدەنتتەردىڭ قۇرىلىس جاساعى جىلداعىداي 1 ماۋسىم كۇنى جازعى ەڭبەكتىڭ شىمىلدىعىن اشقان بولاتىن. سودان بەرگى ءبىر جارىم ايدان استام ۋاقىتتا ستۋدەنت-جۇمىسشىلار ءونىمدى ەڭبەكپەن، جاقسى ناتيجەمەن كوزگە تۇسە ءبىلدى. قازۇۋ قالاشىعى تازالىق جانە قۇرىلىس جۇمىستارىنا ايتارلىقتاي ارالاسقان ستۋدەنتتەر جۇمىستان تىس ۋاقىتتارىن دا بوس وتكىزگەن جوق.

شتاب باسشىسى كولبايەۆ نۇربولات شاعىمان ۇلى ستۋدەنتتەردىڭ بوس ۋاقىتتارىن ءتيىمدى وتكىزىپ، سپورتتىق، قوعامدىق شارالارعا بەلسەنە قاتىستىرۋدى قولعا العان بولاتىن. سول ماقساتقا ساي ، الدىن الا جاسالعان جوسپارعا سايكەس، 5 ماۋسىم كۇنى فۋتبول ويىندارىنان سايىس وتكىزىلسە، 14 ماۋسىم كۇنى ۇلدار مەن قىزداردىڭ قۇراما كوماندالارى اراسىندا ۆولەيبول ويىنىنان جارىس وتكىزىلدى.

فۋتبولدان وتكىزىلگەن سايىسقا «شالعىشىلار»، «سۋعارۋ»، «ەپس»، «قۇرىلىسشىلار بريگاداسى» سىندى كوماندالار مەن قۇرامىندا نۇربولات شاعىمان ۇلى مەن ورىنباسارى قۇدايقۇل باقداۋلەت بولعان باسشىلىقتىڭ «چەلسي» قۇراماسى قاتىستى. قازۇۋ قالاشىعى ستاديونىندا وتكىزىلگەن سايىستى تاماشالاۋعا كورەرمەندەر دە كوپتەپ جينالدى. سايىس قورىتىندىسى بويىنشا، انگليا پرەمەر-ليگاسىنىڭ جەڭىمپاز كلۋبىمەن اتتاس بولعان «چەلسي» كومانداسى باسىم ەسەپپەن ءبىرىنشى ورىنعا يە بولدى.  2-ورىندى «سۋعارۋشىلار» بريگاداسى يەلەنسە، «شالعىشىلار» كومانداسى ءۇشىنشى ورىننان كورىندى. كوپتەگەن قىزىقتارعا تولى بولعان تارتىستى ويىننىڭ سوڭىندا جەڭىمپاز كوماندالار ارنايى كۋبوكپەن ماراپاتتالدى. سونىمەن قاتار، جەكە ويىنشىلارعا دا ارنايى ماراپاتتار تاعايىندالىپ، الىمبەكوۆ ەلدوس «ەڭ ۇزدىك قاقپاشى»، سارسەنباي ايتبەك «ەڭ ۇزدىك شابۋىلشى»، دۇيسەنوۆ تەمىرلان «ەڭ ۇزدىك قورعاۋشى» اتاعىنا يە بولدى.

اراعا اپتا سالىپ وتكىزىلگەن ۆولەيبول سايىسى دا ءبىرشاما تارتىستى ءوتتى. جوعارعى دەڭگەيدەگى سايىستارعا قاتىسىپ جۇرگەن ۆولەيبولشىلار، كاپيتاندار ءوز كوماندالارىن العا سۇيرەدى. قىزۋ ويىن كورسەتىپ، بىر-بىرىنە دەس بەرمەگەن كوماندالاردىڭ ىشىنەن كىل مىقتىلار وزىپ شىعىپ،  ماراپاتتارعا يە بولدى. قورىتىندى ەسەپ بويىنشا، فينالدىق ويىندا جۇلدەگە تالاسقان «ەپس» قۇراماسى ءبىرىنشى ورىنعا يە بولدى. كوماندا كاپيتانى، «قىزىلاراي» ۆولەيبول كومانداسىنىڭ ويىنشىسى ماحمەت كەنجە ۇزدىك ويىنشى رەتىندە اتالىپ ءوتتى. ەكىنشى ورىنعا وزدەرىنىڭ كوڭىلدى اتاۋىمەن  ەرەكشەلەنگەن «كيتكات» كومانداسى يە بولدى. جۇمىس ۋاقىتىندا دا بىرگە جۇمىس ىستەپ، دوستاسىپ ۇلگەرگەن «سقج UNITED» كومانداسىنىڭ مۇشەلەرى ءۇشىنشى ورىندى يەلەندى. بۇل كوماندالار دا وزدەرىنىڭ اتتارى جازىلعان ارنايى كۋبوكتارمەن ماراپاتتالدى.

سايىس ناتيجەسى نۇربولات شاعىمان ۇلىنىڭ ۇيىمداستىرۋىمەن جاستار الاڭىندا وتكىزىلگەن ارنايى كەشتە قورىتىندىلانىپ، جۇلدەگەرلەرگە ماراپاتتارى رەسمي تۇردە تاپسىرىلدى. كەش جاستار بيىمەن جالعاستى.

ايتا كەتەرلىك جايت، الماتى قالاسى «جاسىل ەل» باسقارماسى قازۇۋ جاستارىنىڭ باستاماسىن قولداپ، ۋنيۆەرسيتەتارالىق سايىستار وتكىزۋگە ۇسىنىس تاستادى. وزگە وقۋ ورىندارىنداعى قۇرىلىس جاساعىنىڭ ستۋدەنتتەرىمەن بولاتىن سايىستا ءوز قۇرامامىزعا ساتتىلىك ءارى جالىندى جەڭىس تىلەيمىز!

انەل التايەۆا