«ناتيجەلى جۇمىسپەن قامتۋ جانە جاپپاي كاسىپكەرلىكتى دامىتۋ» باعدارلاماسى اياسىندا بيىل وڭتۇستىكتەن سولتۇستىككە كوش جالعاسىن تابادى.

بۇگىندە قىزىلوردا وبلىسىنان 400 وتباسى سولتۇستىك قازاقستان وبلىسىنا كوشۋگە بەل بايلاپ وتىر، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.     

سولتۇستىك قازاقستان وبلىسىنىڭ 13 اۋدانىندا دا ماماندىق يەلەرىنىڭ تاپشىلىعى سەزىلەدى. مىسالى، ءقازىر وندا مۇعالىمدەر جەتىسپەۋشىلىگى قاتتى بايقالىپ وتىر. سونداي-اق، دەنساۋلىق ساقتاۋ سالاسىنىڭ ماماندارى،  ەلەكترومونتەرلەر، ينجەنەر-مەحانيكتەر، دانەكەرلەۋشىلەر دە تاپشى. ءتىپتى مەملەكەتتىك قىزمەتتە دە بوس ورىندار بار.    

قونىس اۋدارۋشىلار ءۇشىن كوتەرمە اقى تولەنىپ، ءۇي جالداۋعا جانە كوممۋنالدىق قىزمەت اقىلارىنا قارجى بەرىلەدى.  سونىمەن قاتار، جەر تەلىمىن الۋعا دا مۇمكىندىك بار.      

وبلىستىق جۇمىسپەن قامتۋ جانە الەۋمەتتىك باعدارلامالار باسقارماسىنىڭ باسشىسى م.ەرگەشبايەۆتىڭ ايتۋىنشا، سولتۇستىك وڭىردەگى جۇمىس بەرۋشىلەر الدىمەن قونىس اۋدارۋعا نيەت بىلدىرگەندەردى جۇمىس ورنىمەن، تۇراتىن باسپاناسىمەن تانىستىرادى.  سونداي-اق كوشىپ بارعانداردى قاجەت ماماندىققا وقىتۋ جاعى دا قاراستىرىلىپ وتىر.