قازاقستاننىڭ جاڭا كەدەن كودەكسى قۇجات جۇمىستارىن بارىنشا اۆتوماتتاندىرۋدى كوزدەيدى. وسىلايشا، تاۋار تاسيتىن كاسىپكەرلەر بارلىق دەكلاراسيالارىن اقپاراتتىق جۇيە ارقىلى ۇيدەن شىقپاي-اق تاپسىرا الادى، دەپ حابارلايدى Qamshy.kz اقپارات اگەنتتىگى قازاقپاراتقا  سىلتەمە جاساي وتىرىپ.

بۇدان بولەك، كەدەن سالىقتارىن تولەۋدىڭ جاڭا جۇيەسى ەنگىزىلەدى. وعان سايكەس، دەكلارانت ءبىر اۆانستىق تولەم جاسايدى، ال اقپاراتتىق جۇيە ونى باج سالىعى جانە تاعى باسقا سالىق تۇرلەرىنە ءبولىپ تاستايدى.

«سوسىن كەدەندىك سالىقتاردى تولەۋدى ءبىر ايعا دەيىن شەگەرۋگە مۇمكىندىك بار. الايدا ارتىنان پايىزىن تولەۋگە تۋرا كەلەدى. سالىق تولەۋدى التى ايعا دەيىن پايىزسىز شەگەرۋ مۇمكىندىگى دە قاراستىرىلعان. ونداي شارا بارلىعىنا تارالمايدى. ماسەلەن، اۋىل شارۋىشىلىعى تەحنيكاسىن جەتكىزۋ، اسىل تۇقىمدى مالدى تاسىمالداۋ جانە تاعى ءبىرقاتار سالالار بويىنشا التى ايلىق سالىقسىز كەزەڭدى پايدالانۋعا بولادى»، - دەدى ق ر ۇلتتىق ەكونوميكا ءمينيسترى ەرنار باكەنوۆ بۇگىن كودەكس جوباسىن تالقىلاۋعا ارنالعان جيىندا.

بۇگىندە وتاندىق كاسىپكەرلەر جاڭا كەدەن كودەكسىن قولداپ وتىر. الايدا كاسىپكەرلەر اقپاراتتىق تەحنولوگيالاردىڭ قۇجاتتا قالاي كورسەتىلسە، ءىس جۇزىندە دە سولاي ەنگىزىلگەنىن قالايدى. كودەكستىڭ جوباسى ءالى دە تالقىلاناتىن بولادى. كۇزگە قاراي ونى پارلامەنت ءماجىلىسىنىڭ قاراۋىنا ەنگىزۋ جوسپارلانعان.