الەمگە تانىمال National Geographic تەلەارناسى ەكسپو-2017 حالىقارالىق مامانداندىرىلعان كورمەسىنىڭ باستى نىسانى - «نۇر الەم» سفەراسى تۋرالى دەرەكتى فيلم ءتۇسىردى. قالا كوركىنەن شابىت العان ءتۇسىرىلىم توبى ءبىر عيماراتتىڭ عانا ەمەس، ەن دالادا بوي كوتەرگەن تۇتاس استانانىڭ قالىپتاسۋ تاريحىن بەينەلەۋدى ۇيعاردى، دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساي وتىرىپ.

فيلم «بۋردج-حاليفا» (دۋباي)، پەتروناس (كۋالا-لۋمپۋر)، ەۋروتوننەل (لا-مانش بۇعازى) سىندى الەمنىڭ اتاقتى عيماراتتارىنىڭ قۇرىلىس تاريحى كورسەتىلەتىن «مەگاعيماراتتار» (Megastructures) دەرەكتى سەريالىنىڭ ءبىر ەپيزودى بولىپ تابىلادى. وندا قازاقستان استاناسىنداعى قولايسىز اۋا رايى مەن كۇردەلى لوگيستيكالىق، ينفراقۇرىلىمدىق جاعدايلارعا قاراماستان ءىرى نىسانداردىڭ، ونىڭ ىشىندە جاڭا ۆوكزال مەن اۋەجايدىڭ تۇرعىزىلۋى تۋرالى باياندالادى جانە باستى نازار شىنىدان تۇرعىزىلعان الەمدەگى ەڭ ۇلكەن سفەرالىق عيمارات «نۇر الەم» سفەراسىنا اۋدارىلادى. National Geographic ءتۇسىرىلىم توبى سفەرانىڭ سوڭعى شىنىسى ورناتىلعان تاريحي مەزەتتى ءتۇسىرىپ الدى.

ءتۇسىرىلىم جۇمىستارىنا قازاقستان پرەزيدەنتى نۇرسۇلتان نازاربايەۆتىڭ ءوزى قاتىسىپ، جاڭا استانانىڭ بوي كوتەرۋى تۋرالى بايانداپ بەردى.

45 مينۋتتىق «مەگاعيماراتتار: استانا - بولاشاقتىڭ قالاسى» ءفيلمىنىڭ الدىن الا كورسەتىلىمى بۇگىن استاناداعى ەكسپو-2017 كەشەنىندە ءوتتى. ءفيلمنىڭ الەمدىك تۇساۋكەسەرى 10 تامىز كۇنى 40-تان استام مەملەكەتتە جانە 22 تىلدە ۇسىنىلماق. «ءفيلمنىڭ تۇساۋكەسەرى نەگىزگى National Geographic channel ارناسىندا وتەدى جانە ۇلىبريتانيا، يتاليا، يسپانيا، پولشا، سينگاپۋر، ءۇندىستان سەكىلدى بارلىق ەۋرازيا اۋماعىندا ەكى جىل بويى كورسەتىلەدى. ازىرگە كورسەتىلىمنىڭ ناقتى سانى بەلگىسىز»، - دەيدى National Geographic Partners، ەۋروپا-افريكا ءبولىمىنىڭ اتقارۋشى ۆيسە-پرەزيدەنتى دەبورا ارمسترونگ.