كەڭەسكە پرەزيدەنت اكىمشىلىگىنىڭ باسشىسى ءا.جاقسىبەكوۆ، جوعارعى سوت ءتوراعاسى ق.ءمامي، پرەزيدەنت اكىمشىلىگى باسشىسىنىڭ ورىنباسارى ت.دوناقوۆ، باس پروكۋرور ج.اسانوۆ، ۇلتتىق قاۋىپسىزدىك كوميتەتىنىڭ ءتوراعاسى ك.ءماسىموۆ، مەملەكەتتىك قىزمەت ىستەرى جانە سىبايلاس جەمقورلىققا قارسى ءىس-قيمىل اگەنتتىگىنىڭ ءتوراعاسى ق.قوجامجاروۆ، ىشكى ىستەر ءمينيسترى ق.قاسىموۆ، ادىلەت ءمينيسترى م.بەكەتايەۆ، قارجى ءمينيسترى ب.سۇلتانوۆ قاتىستى دەپ Qamshy.kz اقپارات اگەنتتىگى اقورداعا سىلتەمە جاساپ حابارلايدى.

نۇرسۇلتان نازاربايەۆ «100 ناقتى قادام» ۇلت جوسپارىن ىسكە اسىرۋ اياسىندا زاڭنىڭ ۇستەمدىگىن قامتاماسىز ەتۋدىڭ ماڭىزدىلىعىنا نازار اۋدارىپ، وسى باعىتتا دايىندىق جۇمىستارىن ساپالى جۇرگىزۋ قاجەتتىگىن ايتتى.

– ءبىز بۇگىن قىلمىستىق قۋدالاۋ جۇيەسىن جاڭعىرتۋدىڭ بازالىق باعىتتارىن جەتىلدىرۋ جونىندەگى ماسەلەنى قاراستىرىپ وتىرمىز. سولاردىڭ قاتارىندا، قىلمىس پروسەسىندە ازاماتتاردى قورعاۋ دەڭگەيىن ارتتىرۋ، تەرگەۋ جۇرگىزۋ ءتارتىبىن وڭتايلاندىرۋ، قىلمىس پروسەسىندەگى جارىسپالىلىق، سوتقا دەيىنگى ساتىدا سوت باقىلاۋىن ودان ءارى كۇشەيتۋ، قىلمىستىق قۋدالاۋ، پروكۋراتۋرا جانە سوت ورگاندارى اراسىنداعى وكىلەتتىكتەردىڭ قايتالانۋىن بولدىرماۋ جانە ولاردى ناقتى ءبولۋ، – دەدى ەلباسى.

سوڭىندا قازاقستان پرەزيدەنتى ءبىرقاتار ناقتى تاپسىرما بەردى.