ابايدىڭ تۋعانىنا 172 جىل تولۋىنا وراي قازاقستان رەسپۋبليكاسىنىڭ توتەنشە جانە وكىلەتتى ەلشىسى يمانعالي تاسماعامبەتوۆ جانە ديپميسسيا وكىلدەرى ماسكەۋدىڭ قاق تورىندە ورىن تەپكەن عۇلاما اقىن اباي ەسكەرتكىشىنىڭ الدىنا بارىپ گۇل شوقتارىن قويدى دەپ جازادى Qamshy.kz رەسەيدەگى قازاقستان ەلشىلىگى اقپاراتىنا سۇيەنىپ.
ۇلى ويشىل تۇلعانى ەسكە الا وتىرىپ، قۇرمەت كورسەتكەن يماعالي تاسماعامبەتوۆ، 2006 جىلى وسى ەسكەرتكىشتىڭ اشىلۋىنا وراي ءسوز سويلەگەن قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆتىڭ ءسوزىن تاعى ءبىر ەسكە الدى: "وسى ايتۋلى وقيعانىڭ ناق وسى جەردە، ياعني اباي قۇنانبايەۆ شىنايى نيەتتەسى بولعان رەسەي استاناسىنىڭ ورتالىعىندا ءوتۋىنىڭ دە وزىندىك ءمانى بار. اباي العاشقى بولىپ پۋشكيننىڭ ءبىرتۋار شىعارمالارىن قازاق تىلىنە اۋداردى. ونىڭ شىعارماشىلىعىنىڭ ارقاسىندا لەرمونتوۆ، گوتە، بايرون، شيللەردىڭ جانە باسقا دا ەۋروپالىق مادەنيەتتىڭ كوپتەگەن كورنەكتى وكىلدەرىنىڭ شىعارمالارى قازاق تىلىندە سويلەدى. ەندىگى جەردە ماسكەۋدە اباي ەسكەرتكىشىنىڭ بولۋى – بۇل وتكەنگە قۇرمەت كورسەتۋ عانا ەمەس، ەڭ اۋەلى – قازاقستان مەن رەسەيدى بىر-بىرىمەن بايلانىستىراتىن تۇگەسىلمەس تاريحي تابىستار مەن ساۋلەلى ۇمىتتەردىڭ نىشانى بولىپ تابىلادى".
ەستەرىڭىزگە سالا كەتەيىك، قازاقستان ديپلوماتتارى وسى شارا اياسىندا ەسكەرتكىش پەن وعان تيەسىلى اۋماقتا ابباتتاندىرۋ جۇمىستارىن جۇرگىزدى.
ماسكەۋدىڭ چيستىە پرۋدى جەرىندە ورىن تەپكەن اباي ەسكەرتكىشى قازاقستاننىڭ رەسەيگە جاساعان سىيلىعى بولىپ تابىلادى. ونىڭ سالتاناتتى اشىلۋ ءراسىمى قازاقستان رەسپۋبليكاسىنىڭ پرەزيدەنتى نۇرسۇلتان نازاربايەۆ پەن رەسەي فەدەراسياسىنىڭ پرەزيدەنتى ۆلاديمير ءپۋتيننىڭ قاتىسۋىمەن 2006 جىلى 4 ساۋىردە وتكەن بولاتىن.
ەسكەرتكىش قازاقستاندىق ءمۇسىنشى م.اينەكوۆ پەن ديزاينەر ت.سۇلەيمەنوۆتىڭ جوباسى نەگىزىندە ءبىر توپ مۇسىنشىلەر مەن ساۋلەتشىلەردىڭ كۇشىمەن جاسالىندى.
