كەزدەسۋ بارىسىندا ەكىجاقتى ىنتىماقتاستىقتىڭ وزەكتى ماسەلەلەرى، سونىڭ ىشىندە ساۋدا-ەكونوميكالىق قارىم-قاتىناستاردى ودان ءارى دامىتۋ بويىنشا 2017-2018 جىلدارعا ارنالعان بىرلەسكەن شارالاردىڭ جوسپارىن ىسكە اسىرۋ بارىسى تالقىلاندى، دەپ حابارلايدى Qamshy.kz اقپارات اگەنتتىگى پرەمەر-مينيستردىڭ سايتىنا سىلتەمە جاساپ.

باقىتجان ساعىنتايەۆ قازاقستان-بەلارۋس قارىم-قاتىناسى ىلگەرىلەي وتىرىپ، دامىپ جاتقانىن اتاپ ءوتتى. ءوز كەزەگىندە اندرەي كوبياكوۆ قازاقستاننىڭ ساۋدا اينالىمى كولەمى بويىنشا بەلارۋستىڭ نەگىزگى سەرىكتەستەرىنىڭ قاتارىندا ەكەنىن مالىمدەدى.

سونداي-اق، ەكى تاراپ ساۋدا-ەكونوميكالىق ىنتىماقتاستىق جونىندەگى قازاقستان-بەلارۋس ۇكىمەتارالىق كوميسسياسى قىزمەتىنە قاتىستى ماسەلەلەردى قارادى جانە بيىل قازاقستاندا قىركۇيەك ايىندا وتەتىن كوميسسيانىڭ كەزەكتى 13-وتىرىسىن تالقىلادى.

بۇدان وزگە، بيىل مامىر ايىندا قازان قالاسىندا تمد ەلدەرىنىڭ ۇكىمەت باسشىلارى كەڭەسىنىڭ وتىرىسىندا قول قويىلعان، «قازاقستاندىق توقاماق» بازاسىنداعى تاجىريبەلىك كەشەندى بىرلەسىپ پايدالانۋ تۋرالى كەلىسىمنىڭ ىسكە اسىرىلۋ جاعدايى تالقىلاندى.

تاراپتار، سونىمەن قاتار، ەۋرازيالىق ەكونوميكالىق وداق اياسىندا ءوزارا ءىس-قيمىل جاساسۋ ماسەلەلەرىنە نازار اۋداردى. ونەركاسىپتىك سالادا، كولىك جانە كوممۋنيكاسيالار، سونداي-اق عارىش سالاسىندا ىنتىماقتاستىقتى كەڭەيتۋ ماسەلەلەرى قارالدى.  

كەزدەسۋدىڭ سوڭىندا ب. ساعىنتايەۆ پەن ا. كوبياكوۆ استانادا ءوتىپ جاتقان ەكسپو-2017 كورمەسى مەن استانادا قۇرىلاتىن ستارتاپ-حاب اياسىندا بىرلەسكەن جوبالاردى ىسكە اسىرۋ كەلەشەگىن تالقىلادى.

وسى جىلى قازاقستان مەن بەلارۋس اراسىندا ديپلوماتيالىق قارىم-قاتىناستىڭ ورناعانىنا 25 جىل تولادى. ساۋدا-ەكونوميكالىق ىنتىماقتاستىق جونىندەگى قازاقستان-بەلارۋس ۇكىمەتارالىق كوميسسياسى 1996 جىلدان باستاپ جۇمىس ىستەيدى. قازاقستان مەن بەلارۋس اراسىنداعى ساۋدا اينالىمى 2017 جىلعى قاڭتار-مامىر ارالىعىندا 207،8 ملن. دوللاردى قۇراعان، بۇل وتكەن جىلدىڭ كورسەتكىشىمەن سالىستىرعاندا 73%-عا ۇلعايتىلعان.