كەزدەسۋگە قازاقستان رەسپۋبليكاسىنىڭ پرەمەر-مينيسترى ب.ساعىنتايەۆ، ارمەنيا رەسپۋبليكاسىنىڭ پرەمەر-مينيسترى ك.كاراپەتيان، بەلارۋس رەسپۋبليكاسىنىڭ پرەمەر-مينيسترى ا.كوبياكوۆ، قىرعىز رەسپۋبليكاسىنىڭ پرەمەر-مينيسترى س.جەەنبەكوۆ، رەسەي فەدەراسياسى ۇكىمەتىنىڭ ءتوراعاسى د.مەدۆەديەۆ، ەۋرازيالىق ەكونوميكالىق كوميسسيا القاسىنىڭ ءتوراعاسى ت.ساركيسيان قاتىستى دەپ حابارلايدى Qamshy.kz اقپارات اگەنتتىگى اقورداعا سىلتەمە جاساپ.

نۇرسۇلتان نازاربايەۆ ەۋرازيالىق ۇكىمەتارالىق كەڭەس مۇشەلەرىنىڭ ەلورداعا كەلگەندەرىنە قۋانىشتى ەكەنىن جەتكىزىپ، كەزدەسۋدىڭ استانا قالاسىنداعى «ەكسپو-2017» حالىقارالىق كورمەسىمەن تۇسپا-تۇس ءوتىپ وتىرعانىن ايتتى.

– ۇكىمەتتەر باسشىلارىنىڭ ءوز مەملەكەتىنىڭ ۇلتتىق پاۆيلوندارىنا بارۋعا، سونداي-اق قازاقستان مەن وزگە ەلدەردىڭ ەكسپوزيسيالارىن ارالاپ كورۋگە مۇمكىندىكتەرى بار. ەۋرازيالىق ەكونوميكالىق وداقتىڭ ءۇشىنشى جىل جۇمىس ىستەپ جاتقانىن اتاپ وتكەن ءجون. بۇل كەزەڭ الەمدەگى جانە وداققا مۇشە ەلدەردىڭ ۇلتتىق ەكونوميكاسىنداعى كۇردەلى احۋالدارعا بايلانىستى بولىپ وتىر. سونىمەن قاتار، ورتاق نارىق پەن ءبىرىڭعاي ەكونوميكالىق قۇرىلىم قۇرۋ – باستى فاكتور بولىپ سانالادى، – دەدى قازاقستان پرەزيدەنتى.

مەملەكەت باسشىسى ەكونوميكانىڭ ءوسىمى ەلدەر اراسىنداعى تاۋار اينالىمىنىڭ ارتىپ، ءوزارا قارىم-قاتىناستاردىڭ نىعايۋىنا تىكەلەي بايلانىستى ەكەنىن ايتتى.

– ءبىز وسى ۋاقىت ىشىندە دۇرىس باعىتتا ىلگەرىلەي الدىق دەپ ەسەپتەيمىن. ءقازىر ورىن الىپ وتىرعان ءبىرقاتار ماسەلەگە قاراماستان، ەۋرازيالىق ەكونوميكالىق وداقتى نىعايتۋىمىز قاجەت. الدىمىزدا ەل ىشىندەگى ماسەلەلەردى شەشىپ، ءوزارا قارىم-قاتىناسىمىزدى ودان ءارى دامىتا ءتۇسۋ مىندەتى تۇر. بۇل جۇمىستاعى نەگىزگى ءرولدى ۇكىمەتتەرىمىز اتقارادى. بۇل دەگەنىمىز – ەكونوميكالىق مىندەتتەردى شەشۋ، مەملەكەتتەر اراسىنداعى ءوزارا ءىس-قيمىل ماسەلەلەرىن رەتتەۋ، – دەدى نۇرسۇلتان نازاربايەۆ.

سوڭىندا قازاقستان پرەزيدەنتى كەڭەستىڭ بۇگىنگى وتىرىسى ارقىلى ۇيىمدى ءارى قاراي دامىتۋعا ماڭىزدى ۇلەس قوسىلاتىنىن اتاپ ءوتىپ، قاتىسۋشىلاردىڭ جۇمىسىنا تابىس تىلەدى.