قاراعاندىدا كوپجىلدىق تاريحى بار «شاحتەر» فۋتبول كلۋبى ساتىپ الۋ قۇقىعىمەن سەنىمدى باسقارۋعا بەرۋ ءۇشىن، بار بولعانى مىڭ تەڭگەگە اۋكسيونعا شىعارىلدى دەپ حابارلايدى Qamshy.kz اقپارات اگەنتتىگى  vesti.kz-كە سىلتەمە جاساي وتىرىپ.

قاراعاندىدا ورتالىق كوممۋنيكاسيالار قىزمەتىندە وتكەن بريفينگتە وبلىستىڭ مەملەكەتتىك اكتيۆتەر  جانە ساتىپ الۋ باسقارماسىنىڭ باسشىسى مۇرات كادەكوۆ قازىرگى ساتتە ساتۋ الدىنداعى دايىندىق جۇمىستارى ءجۇرىپ جاتقانىن مالىمدەدى. 

«شاحتەر» فۋتبول كلۋبى» اق-نى ساتۋ الدىنداعى دايىندىق ءجۇرىپ جاتىر – بۇل باعالاۋشىنى انىقتاۋ بويىنشا كونكۋرستىق پروسەدۋرالار وتكىزۋ، باعالاۋ بويىنشا ەسەپتى ۇسىنۋ، ۆەب-پورتالعا سالۋ ءۇشىن قۇجاتتار دايىنداۋ، تەندەرلىك كوميسسيا وتىرىسىن وتكىزۋ»، – دەدى مۇرات كادەكوۆ. ول كلۋبتىڭ اۋكسيونداعى باستاپقى قۇنى ءبىر مىڭ تەڭگە ەكەنىن اتاپ ءوتتى. بۇل رەتتە، ساتىپ الۋ قۇقىعىمەن كلۋبتى سەنىمدى باسقارۋعا العان تۇلعا ونىڭ 208 ميلليون تەڭگە كولەمىندەگى كرەديتورلىق قارىزىن جابۋى ءتيىس بولادى. «كلۋبتىڭ ناقتى قۇنى 208 ميلليون تەڭگەنى قۇرايدى»، – دەدى مۇرات كادەكوۆ.