انتيتەررورلىق قورعانىس تالاپتارىن بۇزعانى ءۇشىن قوستانايلىق كاسىپورىندارعا 3 ميلليون تەڭگە مولشەرىندە ايىپپۇل سالىندى دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.
قوستاناي وبلىسىنىڭ ىىد-نەن حابارلاعانداي، زاڭ بۇزۋشىلىقتار مەملەكەتتىك نىسانداردى، ويىن-ساۋىق ورتالىقتارى مەن ساۋدا ۇيلەرىن، وزگە دە كاسىپورىنداردى تەكسەرۋ كەزىندە انىقتالىپ وتىر. انتيتەررورلىق تالاپتاردى بۇزعانى ءۇشىن 9 باسشى اكىمشىلىك جاۋاپكەرشىلىككە تارتىلدى.
قوستاناي وبلىسىنىڭ ءىىد ەكسترەميزمگە قارسى باسقارما باستىعى پوليسيا پولكوۆنيگى ەربول دەربىسوۆ كەز كەلگەن كاسىپورىننىڭ عيماراتى انتيتەررورلىق تالاپتارعا ساي بولۋى كەرەكتىگىن ايتادى.
«نەگىزگى تالاپ ساپالى وتكىزۋ پۋنكتىنە، اقپاراتتىق قاۋىپسىزدىك قورعانىسىن ۇيىمداستىرۋعا، انتيتەررورلىق قورعانىستىڭ ءتولقۇجاتىنىڭ جاسالۋىنا، پروفيلاكتيكالىق جۇمىستاردىڭ جۇرگىزىلىپ، عيمارات ىشىندەگى ءقاۋىپتى زاتتى انىقتاي الاتىن تەحنيك پەرسونالىن دايىنداۋعا قويىلادى»، – دەيدى پوليسيا پولكوۆنيگى.
ەربول دەربىسوۆتىڭ ايتۋىنشا، ايىپپۇل ارقالاعان كاسىپورىنداردىڭ باسشىلارى بىرنەشە رەت ەسكەرتۋ جاسالعان. ەسكەرتۋدى قۇلاققا ىلمەگەن ولار اكىمشىلىك كودەكستىڭ 149-بابىنا سايكەس جاۋاپكەرشىلىككە تارتىلعان.
«اتالعان باپ بويىنشا جەكە جانە لاۋازىمدى تۇلعالارعا ءجۇز، شاعىن كاسىپكەرلىك سۋبەكتىلەرىنە نەمەسە كوممەرسيالىق ەمەس ۇيىمدارعا ەكى ءجۇز دەيىن، ال ورتا بيزنەس سۋبەكتىلەرىنە ءۇش ءجۇز، ءىرى كاسىپورىندارعا بەس ءجۇز ايلىق ەسەپتىك كورسەتكىشكە دەيىن ايىپپۇل سالىنادى. زاڭ بۇزۋشىلىق ارەكەتتەرى قايتالانىپ جاتسا، جازا دا قاتايا تۇسەدى»، – دەيدى ە.دەربىسوۆ.
