وتكەن دەمالىس كۇنى ءبىر توپ ءتۋريستىڭ تالعار شاتقالىنىڭ سول جاق قاپتالى ارقىلى بۋتاكوۆسكوە شاتقالىنداعى سارقىراماعا بەت العانى جانە ولاردىڭ اراسىنداعى ءبىر جاس جىگىتتىڭ قولىن جىلان شاققانى جايلى اقپارات توتەنشە جاعدايلار كوميتەتىنە كەلىپ تۇسەدى. رەسپۋبليكالىق جەدەل-قۇتقارۋ جاساعىنىڭ جەدەل توبى شاقىرىلعان جەرگە بارىپ، جىلان شاققان ساياحاتشىنى جەدەل جاردەم قىزمەتكەرلەرىنە دەر كەزىندە جەتكىزدى دەپ حابارلايدى Qاmshy.kz اقپارات اگەنتتىگى ق ر ءىىم توتەنشە جاعدايلار كوميتەتىنىڭ باسپا ءسوز قىزمەتىنە سىلتەمە جاساپ.

ق ر ءىىم توتەنشە جاعدايلار كوميتەتى ساياحاتشىلارعا ساق بولۋدى ەسكەرتەدى. اسىرەسە تاۋعا شىققان تۋريستەردىڭ جابىق اياق كيىم كيىپ، سوقپاق جولدارمەن ءجۇرۋىن، زياندى جاندىكتەرگە بەتالدى تيىسپەۋىن ايتادى.  جىلان شاققان جاعدايدا سۋپراستين، تاۆەگيل سياقتى انتيگيستامين دارىلەردى قابىلداپ، كوبىرەك سۋ ءىشۋ كەرەكتىگىن، اۋىرعان مۇشەنى قيمىلداتپاي، جاقىن ماڭداعى مەديسينالىق ورتالىقتىڭ كومەگىنە جۇگىنۋ قاجەتتىگىن ەسكەرتەدى.