كەزدەسۋ بارىسىندا قازاقستان پرەزيدەنتى سوڭعى جىلدارى كاسىپورىننىڭ وڭ ناتيجەلەرگە قول جەتكىزىپ وتىرعانىن اتاپ ءوتتى دەپ حابارلايدى Qamshy.kz اقپارات اگەنتتىگى ق ر پرەزيدەنتىنىڭ باسپا ءسوز قىزمەتىنە سىلتەمە جاساي وتىرىپ.

– مەملەكەت تاراپىنان باستامالاردىڭ بارىنە جان-جاقتى قولداۋ كورسەتىلدى. بۇگىندە كومبينات مەيلىنشە تۇراقتى جۇمىس ىستەپ، دامىپ كەلە جاتىر. قولداعى مالىمەتكە سايكەس، بىلتىر ءوندىرىستىڭ 10%-عا، كىرىس كولەمىنىڭ 20%-عا ارتقانى بايقالادى، – دەدى ەلباسى.

مەملەكەت باسشىسى شەتەلدىك كومپانيالاردى تارتۋ ارقىلى يننوۆاسيالىق جوبالاردى ودان ءارى ىسكە اسىرۋدىڭ قاجەت ەكەنىنە نازار اۋدارىپ، ول كاسىپورىننىڭ ءارى قاراي دامۋىنىڭ ماڭىزدى تىرەگىنە اينالاتىنىن ايتتى.

«وسكەمەن تيتان-ماگنيي كومبيناتى» اكسيونەرلىك قوعامى ديرەكتورلار كەڭەسىنىڭ ءتوراعاسى س.گەللەر مەن كاسىپورىن پرەزيدەنتى ءا.مامىتوۆا كەزدەسۋگە مۇمكىندىك جاساعانى ءۇشىن نۇرسۇلتان نازاربايەۆقا العىس ءبىلدىردى.

– ءسىز اتاپ وتكەن ءوندىرىس كولەمىنىڭ ءوسۋى اۋە-عارىش جانە ونەركاسىپ نارىقتارىنداعى جالپى وسىمدەرمەن بايلانىستى بولدى. بىرلەسكەن كاسىپورىندار ىسكە قوسىلدى، جوبالىق قۋاتقا جوسپارلى تۇردە قول جەتكىزۋ بايقالۋدا، – دەدى ءا.مامىتوۆا.

قازاقستان پرەزيدەنتىنە شەتەلدىك ارىپتەستەرمەن بىرلەسە اتقارىلىپ جاتقان جۇمىستار جونىندە باياندالدى.

– 2014 جىلى فرانسيا ۇكىمەتىمەن بىرلەسىپ، اتوم ونەركاسىبىنە ارنالعان تيتان قۇيمالارى مەن بۇيىمدارىن وندىرەتىن ەكىنشى كاسىپورىننىڭ قۇرىلعانىن ەسكە سالعىم كەلەدى. بۇگىندە زاۋىت قۇرىلىسى اياقتالدى. بيىلعى 15 قىركۇيەكتە زاۋىتتىڭ اشىلۋ ءراسىمى وتەدى، – دەدى «وسكەمەن تيتان-ماگنيي كومبيناتى» اكسيونەرلىك قوعامىنىڭ پرەزيدەنتى.

سونداي-اق، ءا.مامىتوۆا كاسىپورىننىڭ وڭتۇستىككورەيالىق «POSCO» كومپانياسىمەن بىرلەسكەن قىزمەتى جونىندە ايتتى.

– بىرلەسكەن جوبانى ىسكە اسىرۋ جانە زاماناۋي تەحنولوگيالاردى قولدانۋ قازاقستان-كورەيا كاسىپورنىنا الەمنىڭ جالپاق تيتان پروكاتى نارىعىنا شىعۋعا مۇمكىندىك بەرەدى، – دەدى ءا.مامىتوۆا.

مەملەكەت باسشىسى «وسكەمەن تيتان-ماگنيي كومبيناتى» اكسيونەرلىك قوعامىنىڭ جۇمىسىمەن قۇرىلعالى بەرى تانىس ەكەنىن ايتىپ، كاسىپورىندى شيكىزاتپەن قامتاماسىز ەتۋ پەرسپەكتيۆاسى جونىندە سۇرادى.

ءا.مامىتوۆا قۇرامىندا تيتانى بار شيكىزاتتار حالىقارالىق اۋە-عارىش ستاندارتتارىنا سايكەس الىس شەتەلدەردەن جەتكىزىلەتىنىن اتاپ ءوتتى.

– بيىل «وسكەمەن تيتان-ماگنيي كومبيناتى» اكسيونەرلىك قوعامىنىڭ 2022 جىلعا دەيىنگى دامۋ باعدارلاماسى اياسىندا يلمەنيت كونسەنتراتىن وندىرەتىن ەكىنشى كەن بايىتۋ فابريكاسىنىڭ قۇرىلىسى باستالدى. قازاقستاندىق ۇلەستى ارتتىرۋ ماقساتىمەن ءۇلبى مەتاللۋرگيا كومبيناتىنىڭ ماماندارىمەن بىرلەسىپ ازىرلەنگەن جاڭا تەحنولوگيالار ەنگىزىلدى، – دەپ تۇيىندەدى ءا.مامىتوۆا.