مەملەكەتتىك حاتشى وتىرىستى اشىپ، قازاقستان پرەزيدەنتى «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا «سانانىڭ اشىقتىعىن» باستى باسىمدىقتاردىڭ ءبىرى رەتىندە ايقىنداپ بەرگەنىن اتاپ ءوتتى. گۇلشارا ءابدىقالىقوۆا «بولاشاق» باعدارلاماسى سانانىڭ اشىقتىعىن ارتتىرۋعا سەپتىگىن تيگىزەتىنىن ايتتى دەپ حابارلايدى Qamshy.kz اقپارات اگەنتتىگى اقورداعا سىلتەمە جاساي وتىرىپ.
– وسكەلەڭ ۇرپاق الەمنىڭ ۇزدىك جەتىستىكتەرىنە اشىق ءارى بەيىم بولۋعا ءتيىس. پرەزيدەنتتىك ستيپەنديا قازاقستاننىڭ قازىرگى جاستارىنا ءبىلىم ءورىسىن كەڭەيتۋگە، الەمنىڭ جەتەكشى جوعارى وقۋ ورىندارىندا وقۋعا، ۇزدىك تاجىريبەلىك ماشىقتاردى يگەرۋگە مۇمكىندىك بەرەدى، – دەدى گۇلشارا ءابدىقالىقوۆا.
وتىرىس بارىسىندا ءبىلىم جانە عىلىم ءمينيسترى ە.ساعادييەۆتىڭ «بولاشاق» حالىقارالىق ستيپەندياسىن ىسكە اسىرۋ جونىندەگى نورماتيۆتىك قۇقىقتىق اكتىلەردى جەتىلدىرۋ تۋرالى ەسەبى تىڭدالدى، سونداي-اق «بولاشاق» باعدارلاماسىن ىسكە اسىرۋعا قاتىستى ءبىرقاتار ماسەلە قارالدى.
كوميسسيا شەشىمىمەن ماگيستراتۋرادا جانە دوكتورانتۋرادا وقۋعا، سونىمەن قاتار الەمنىڭ جەتەكشى عىلىمي ورتالىقتارىندا تاعىلىمدامادان وتۋگە جىبەرىلەتىن 80 ۇمىتكەرگە ستيپەنديا تاعايىندالدى.
مەملەكەتتىك حاتشى وتىرىستى قورىتىندىلاپ، «بولاشاق» حالىقارالىق ستيپەندياسىن ىسكە اسىرۋ تەتىكتەرىن ودان ءارى جەتىلدىرۋ جانە تيىمدىلىگىن ارتتىرۋ جونىندە ءبىرقاتار تاپسىرما بەردى.
