بۇگىن استاناداعى بەيبىتشىلىك جانە كەلىسىم سارايىندا قازاقستاننىڭ ءدىني بىرلەستىكتەرىنىڭ وكىلدەرى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە ءدىني قىزمەت جانە ءدىني بىرلەستىكتەر ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» قازاقستان رەسپۋبليكاسىنىڭ زاڭ جوباسىن تالقىلاۋ بويىنشا جينالىس وتكىزدى دەپ جازادى Qamshy.kz اقپارات اگەنتتىگى.

اتالعان ءىس-شاراعا ق ر ءدىن ىستەرى جانە ازاماتتىق قوعام مينيسترلىگىنىڭ ۆيسە-مينيسترى ب.س.ارىن، مادەنيەتتەر مەن دىندەردىڭ حالىقارالىق ورتالىعىنىڭ ديرەكتورى ا.پ.ابۋوۆ، سونداي-اق، ءدىني بىرلەستىكتەر باسشىلارى مەن وكىلدەرى، اتاپ ايتقاندا قازاقستان مۇسىلماندار ءدىني باسقارماسى، قازاقستانداعى پراۆوسلاۆ شىركەۋى، قازاقستانداعى ريم-كاتوليك شىركەۋى، ەۆانگەلدىك-ليۋتەران شىركەۋىنىڭ وكىلدەرى  قاتىستى.

تالقىلانىپ وتىرعان زاڭ جوباسىندا شەتەلدە ءدىني ءبىلىم الۋ، ءدىن قىزمەتىنە مەملەكەتتىك قىزمەتكەرلەردىڭ قاتىسۋى، ءدىني جورالعىلار مەن راسىمدەر بويىنشا نەكەنى قيعىزۋعا قاتىستى جاڭا نورمالار كورسەتىلگەن.

زاڭ جوباسى اياسىندا سونداي-اق، قوعامدىق ورىنداردا ادامنىڭ-بەت بەينەسىن تۇمشالايتىن كيىم تۇرلەرىن كيۋگە، دەسترۋكتيۆتى يدەولوگيالىق اعىمداردى ناسيحاتتايتىن كيىم تۇرلەرىن كيۋگە جانە تاراتۋعا شەكتەۋ قويۋ كوزدەلگەن. سونداي-اق، اتالعان كيىم تۇرلەرىن باق-تا جارنامالاۋعا تىيىم سالىنادى.  

بۇدان بولەك، زاڭ جوباسى ءدىني بىرلەستىكتەردىڭ قارجىلىق اشىقتىعىن قامتاماسىز ەتۋ، ءدىني ەكسترەميزم جانە تەرروريزمگە قارسى ءىس-قيمىل بويىنشا جەرگىلىكتى جانە ورتالىق مەملەكەتتىك ورگانداردىڭ جۇمىسىنىڭ تيىمدىلىگىنە باعا بەرۋ جۇيەسىن ەنگىزۋ، ءدىني قاتىناستار سۋبەكتىلەرىنىڭ قىزمەتىنە ءدىن سالاسىنداعى ۋاكىلەتتى ورگاننىڭ باقىلاۋىن كۇشەيتۋگە باعىتتالعان.

شارا بارىسىندا ۆيسە-مينيستر بەرىك ارىن: «اتالعان زاڭنامالىق قۇجاتتى قابىلداۋ – رۋحاني-ادامگەرشىلىك قۇندىلىقتاردى دامىتۋ بويىنشا ءدىن سالاسىندا مەملەكەتتىك ورگاندار مەن ازاماتتىق قوعام ينستيتۋتتارى جۇمىسىنىڭ تيىمدىلىگىن ارتتىراتىنى ءسوزسىز، سونداي-اق، قوعامدا ءدىني راديكالدى يدەيالاردىڭ تارالۋىنا جول بەرمەيدى»، – دەپ اتاپ ءوتتى. 

ال، ءدىني بىرلەستىكتەردىڭ وكىلدەرى زاڭ جوباسىن قولداپ، وزدەرىنىڭ ۇسىنىستارىن ءبىلدىردى. ەستەرىڭىزگە سالا كەتەيىك، اتالعان زاڭ جوباسى تالقىلانۋ ءۇشىن ق ر ءدىن ىستەرى جانە ازاماتتىق قوعام مينيسترلىگىنىڭ رەسمي سايتىنا جانە «ەلەكتروندى ۇكىمەت» پورتالىنا ورنالاستىرىلعان.