«نۇرلى جەر» باعدارلاماسىنا 200 ملرد. تەڭگەدەن استام قارجى بولىنەدى. بۇل تۋرالى بۇگىن ۇكىمەتتىڭ سەلەكتورلىق رەجىمدەگى وتىرىسىندا «2018-2020 جىلدارعا ارنالعان رەسپۋبليكالىق بيۋدجەت تۋرالى» زاڭ جوباسىن تانىستىرعان ق ر قارجى ءمينيسترى باقىت سۇلتانوۆ ءمالىم ەتتى دەپ حابارلايدى Qamshy.kz اقپارات اگەنتتىگى قازاقپاراتقا سىلتەمە جاساپ.
«2018 جىلى ەكونوميكانىڭ ناقتى سەكتورىن دامىتۋعا 1،4 ترلن. تەڭگە كوزدەلگەن. اعىمداعى جىلمەن سالىستىرعاندا شىعىستار كولەمىنىڭ ازايۋى ەكى نەگىزگى فاكتورعا بايلانىستى بولدى.
بىرىنشىدەن، باعدارلامالاردى قارجىلاندىرۋ كوزدەرىنىڭ ۇلتتىق قوردان بەرىلەتىن نىسانالى ترانسفەرتتەن مۇنايلىق ەمەس كىرىستەرگە وزگەرتىلدى، ياعني كەلەسى جىلدارى رەسپۋبليكالىق بيۋدجەتتىڭ كوزدەرىنەن قارجىلاندىرىلاتىن بولادى. ەكىنشىدەن، كۆازيمەملەكەتتىك سەكتور سۋبەكتىلەرىنىڭ اعىمداعى جانە كەلەسى جىلدىڭ بيۋدجەت قاراجاتىن يگەرۋ بولجامدارى ەسەپكە الىندى»، - دەدى ول.
ءمينيستردىڭ دەرەگىنشە، «نۇرلى جول» باعدارلاماسىن ىسكە اسىرۋدى جالعاستىرۋعا 512،6 ملرد. تەڭگە، ودان 2018 جىلعا 243،3 ملرد. تەڭگە سوماسىندا شىعىستار كوزدەلدى. ال «نۇرلى جەر» تۇرعىن ءۇي قۇرىلىسى باعدارلاماسىنا 208،8 ملرد. تەڭگە، ودان 2018 جىلعا 125،2 ملرد. تەڭگە باعىتتاۋ ۇسىنىلىپ وتىر.
«اگروونەركاسىپ كەشەنىن دامىتۋ باعدارلاماسى بويىنشا 2018 جىلعا 195 ملرد. تەڭگە كوزدەلدى. بۇل شىعىستار قارجى قىزمەتتەرىنىڭ (سۋبسيديالاردىڭ) قول جەتىمدىلىگىن ارتتىرۋ جونىندەگى ءىس-شارالارعا، سۋ شارۋاشىلىعىن جانە ۆەتەريناريانى دامىتۋعا، فيتوسانيتاريالىق قاۋىپسىزدىكتى قامتاماسىز ەتۋگە باعىتتالاتىن بولادى. يندۋستريالىق-يننوۆاسيالىق دامۋ مەملەكەتتىك باعدارلاماسىنىڭ ەكىنشى كەزەڭىن ىسكە اسىرۋعا جالپى سوماسى 232،9 ملرد. تەڭگە، ونىڭ ىشىندە 2018 جىلعا 76،1 ملرد. تەڭگە كوزدەلگەن»، - دەدى ب.سۇلتانوۆ.
ونىڭ ايتۋىنشا، 2018 جىلى كولىك ينفراقۇرىلىمىن دامىتۋعا 292،6 ملرد. تەڭگە جۇمسالاتىن بولادى. مەملەكەتتىڭ قورعانىس قابىلەتى مەن قاۋىپسىزدىگىن، قۇقىق ءتارتىبىنىڭ ساقتالۋىن قامتاماسىز ەتۋگە جانە ىشكى تۇراقتىلىقتى قولداۋعا 2018 جىلى شىعىستار 1 088،9 ملرد. تەڭگەنى قۇرايدى.
«رەسپۋبليكالىق بيۋدجەت تاپشىلىعى جالپى ىشكى ونىمگە قاراعاندا 2018 جىلعى 1،1 پايىزدان 2019-2020 جىلدارى 1 پايىزعا تومەندەيتىن بولادى. بۇل مەملەكەتتىك بورىش كولەمىن شەكتى دەڭگەيدە ساقتاۋعا مۇمكىندىك بەرەدى»، - دەدى ول.
