بۇگىن ق ر تۇڭعىش پرەزيدەنتى – ەلباسى قورى جانىنداعى الەمدىك ەكونوميكا جانە ساياسات ينستيتۋتىندا (اەسي) مەملەكەتتىك ورگاندار، ۇلتتىق كومپانيالار، ساراپشىلار جانە عالىمداردىڭ قاتىسۋىمەن «قازاقستاننىڭ اگرووندىرىستىك كەشەنى – ەكونوميكانىڭ جاڭا درايۆەرى» اتتى دوڭگەلەك ۇستەل بولىپ ءوتتى دەپ حابارلايدى Qamshy.kz اقپارات اگەنتتىگى.

پىكىرتالاسقا قاتىسۋشىلار قازاقستاننىڭ اۋىلشارۋاشىلىق سالاسىنىڭ دامۋ ماسەلەلەرىن، ناقتىلاپ ايتقاندا، مەملەكەت باسشىسىنىڭ «قازاقستاننىڭ ءۇشىنشى جاڭعىرۋى: جاھاندىق باسەكەگە قابىلەتتىلىك» اتتى جولداۋىندا ايتىلعان تاپسىرمالاردى جۇزەگە اسىرۋ جولدارىن سارالادى: وتاندىق اۋىلشارۋاشىلىق ونىمدەرىنىڭ ەكسپورتتىق الەۋەتىنىڭ دامۋى، اۋىلشارۋاشىلىق كووپەراسياسىنا شاعىن جانە ورتا شارۋاشىلىقتاردى بارىنشا تارتۋ، سۋ رەسۋرستارىن ءتيىمدى پايدالانۋ مەن اوك ساۋدا-لوگيستيكالىق ينفراقۇرىلىمىن دامىتۋ سەكىلدى وزەكتى ماسەلەلەردى قاراستىرماق.

– ەلىمىزدىڭ اگرووندىرىستىك كەشەنى ەكونوميكانىڭ جاڭا درايۆەرىنە اينالۋى كەرەك. قازاقستان اۋىل شارۋاشىلىعىندا ۇلكەن الەۋەتكە يە. اۋىل شارۋاشىلىعى – مەملەكەت ەكونوميكاسىنىڭ نەگىزگى باعىتتارىنىڭ ءبىرى جانە بىزدە ەكولوگيالىق تازا ونىمدەردى ەكسپورتتاۋ ارقىلى الەمدىك ازىق-تۇلىك نارىعىندا ءوز ورنىمىزدى الۋ ءۇشىن بارلىق جاعداي بار، – دەدى ءوز بايانداماسىندا اەسي ديرەكتورى ەرجان سالتىبايەۆ.

ە.سالتىبايەۆتىڭ سوزىنشە، سوڭعى جىلدارى الەمنىڭ مۇناي، گاز جانە مەتالل نارىعىندا ۇلكەن قۇبىلمالىلىق بايقالۋدا. ءجىو ەداۋىر بولىگىن قۇرايتىن قازاقستاننىڭ تاۋ-كەن ءونىدىرىسى سالاسى شيكىزات رەسۋرستارىنا دەگەن باعانىڭ الەمدىك كونيۋنكتۋراسىنا بايلانىستى. مىقتى اوك قازاقستان ەكونوميكاسىنىڭ دامۋىندا تۇراقتىلىقتى ساقتاۋعا كومەكتەسەدى.

سونىمەن قاتار، دوڭگەلەك ۇستەل اياسىندا 2017-2021 جىلدارعا ارنالعان اوك دامۋىنىڭ جاڭا مەملەكەتتىك باعدارلاماسىن جۇزەگە اسۋ بارىسى دا تالقىلاندى.

پىكىرتالاسقا قاتىسقاندار: قايرات ايتۋعانوۆ – ق ر اۋىلشارۋاشىلىعى ۆيسە-مينيسترى؛ ەۆگەنيي گان – قازاقستان استىق وڭدەۋشىلەر وداعىنىڭ پرەزيدەنتى؛ دامير ەگىزبايەۆ – «ۇلتتىق اگرارلىق عىلىمي ورتالىق» باسقارما ءتوراعاسىنىڭ ورىنباسارى؛ اجار قاجىبەكوۆا – ق ر اۋىلشارۋاشىلىق مينيسترلىگى ەگىن شارۋاشىلىعى دەپارتامەنتىنىڭ ديرەكتورى؛ ليليا مۋسينا – «قازاگرو» ۇبح» اق باسقارما ءتوراعاسىنىڭ كەڭەسشىسى؛ ارنۇر مۇحامەدجانوۆ – ق ر اۋىلشارۋاشىلىق مينيسترلىگى ستراتەگيالار جوسپارلاۋ جانە ساراپتاما دەپارتامەنتىنىڭ ديرەكتورى؛ دۋمان وسپانوۆ – «اۋىلشارۋاشىلىعىن قارجىلاي قولداۋ قورى» اق باسقارما ءتوراعاسىنىڭ ورىنباسارى؛ ميحايل ميرونەنكو – ق ر تۇڭعىش پرەزيدەنتى – ەلباسى كىتاپحاناسىنىڭ ستراتەگيالىق زەرتتەۋلەر مەن بولجاۋ قىزمەتىنىڭ جەتەكشىسى جانە ت.ب.