ورال قالاسىندا وتكەن «بولاشاققا باعدار: جاستاردىڭ جەتىستىك جولى» ايماقتىق جاستار فورۋمىندا وبلىستىق جاستار ۇيىمدارى اتىنان ءسوز العان جانىبەك اۋداندىق «اقباستاۋ» جاستار قوعامدىق بىرلەستىگىنىڭ ءتوراعاسى رۋسلان نۇرالييەۆ وڭىردە «رۋحاني جاڭعىرۋ» باعدارلاماسىن ىسكە اسىرۋعا جاستاردى تارتۋ ماقساتىندا بەلسەندى جاستار مەن جاستار ۇيىمدارىن بىرىكتىرەتىن «ەلىم مەنىڭ» جاستار كواليسياسىن قۇرۋدى ۇسىندى.

اتالعان شاراعا قاتىسقان  70 دەلەگات ءارتۇرلى سالانىڭ وكىلدەرى. ونىڭ ىشىندە رەسپۋبليكالىق جانە ايماقتىق جاستار ۇيىمدارى كوشباسشىلارى، جوعارى وقۋ ورىندارى ءوزىن-وزى باسقارۋ ۇيىمدارى مۇشەلەرى، جاس جۋرناليستەر، اتاقتى سپورتشىلار، تانىمال بلوگەرلەر، ەرىكتىلەرمەن قاتار، اتىراۋ، اقتوبە، ماڭعىستاۋ وبلىستارى جاستار  وكىلدەرى دە بار. 

فورۋم جۇمىسىنا قاتىسقان وبلىس اكىمى التاي كولگىنوۆ دەلەگاتتارعا مەملەكەت باسشىسى ن.ءا.نازاربايەۆ «بولاشاققا باعدار: رۋحاني جاڭعىرۋ» اتتى ماقالاسىندا «رۋحاني جاڭعىرۋ» باعدارلاماسىنىڭ قۇرامداس بولىگى بولىپ تابىلاتىن «تۋعان جەر» باعدارلاماسى جالپىۇلتتىق ءپاتريوتيزمدى، تۋعان جەرگە، وسكەن اۋىلعا، قالا مەن وڭىرگە دەگەن سۇيىسپەنشىلىكتى قالىپتاستىرۋعا باعىتتالاتىنىن اتاپ ءوتىپ، ءار سالادا ەل دامۋىنا ءوز ۇلەستەرىن قوسىپ جۇرگەن مۇحتار مانكەيەۆ، تۇرسىنبەك قاباتوۆ، الپامىس شاريموۆ سىندى باتىسقازاقستاندىق جاستاردىڭ قىزمەتىن ۇلگى ەتتى.

سونداي-اق، «جاسىل ەل» جاستار ەڭبەك جاساقتارىنىڭ رەسپۋبليكالىق شتابى جەتەكشىسى توحتار بولىسوۆ، «قازاقستان ستۋدەنتتەرى اليانسى» رەسپۋبليكالىق قوزعالىسى كوشباسشىسى يلياس تۇستىكبايەۆتار ءوڭىر جاستارىنا «رۋحاني جاڭعىرۋ» باعدارلاماسى اياسىندا جاڭا جوبالاردى بىرىگىپ جۇزەگە اسىرۋعا شاقىرسا، ءوز كەزەگىندە ءسوز العان جاس ونەرپاز مارينا بيگالييەۆا جاس ۇرپاققا تاعىلىمى مول اقجايىق وڭىرىندەگى تاريحي ورىندار تۋرالى مەكتەپ وقۋشىلارى مەن ستۋدەنتتەر ءۇشىن سمارتفوندارعا ارنالعان ارنايى ءموبيلدى قوسىمشا، ۆيرتۋالدى ەلەكتروندى ولكەتانۋ كىتاپشاسىن جاساۋدى ۇسىندى.