ق ر پرەزيدەنتى نۇرسۇلتان نازاربايەۆ قازاقستاندىقتاردى كونستيتۋسيا كۇنىمەن قۇتتىقتادى. بۇل تۋرالى Qamshy.kz اقپارات اگەنتتىگى اقوردانىڭ باسپا ءسوز قىزمەتىنە سىلتەمە جاساپ حابارلايدى.

«قىمباتتى وتانداستار! بارشاڭىزدى حالقىمىز ءۇشىن ماڭىزى زور مەرەكە – كونستيتۋسيا كۇنىمەن قۇتتىقتايمىن!

وسىدان 22 جىل بۇرىن جالپىحالىقتىق رەفەرەندۋمدا قابىلدانعان اتا زاڭىمىز قازاقستان رەسپۋبليكاسىنىڭ زايىرلى، قۇقىقتىق جانە ءبىرتۇتاس مەملەكەت رەتىندەگى بازالىق نەگىزىن قالادى. كونستيتۋسيا تاۋەلسىزدىگىمىزدىڭ بەرىك تىرەگىنە، تابىستى دامۋىمىزدىڭ جانە قازاقستاننىڭ حالىقارالىق دەڭگەيدەگى بيىك بەدەلىنىڭ كەپىلىنە اينالدى. ول ەلىمىزدىڭ باستى قۇندىلىقتارى رەتىندە قوعامدىق-ساياسي بىرلىكتى، كەلىسىم مەن تۇراقتىلىقتى قالىپتاستىردى.

ساياسي جۇيەنىڭ تيىمدىلىگىن ارتتىرۋ جانە مەملەكەتتىگىمىزدىڭ مىزعىماستىعىن قامتاماسىز ەتۋ باعىتىندا ەلىمىزدە جۇرگىزىلگەن كونستيتۋسيالىق رەفورما جاڭا جاھاندىق وزگەرىستەرگە جاۋاپ بەرەدى. كونستيتۋسيامىز قازاقستاننىڭ الەمنىڭ وزىق 30 ەلىنىڭ قاتارىنا قوسىلۋى جولىندا جاڭعىرۋ ۇدەرىسىن ودان ءارى ىسكە اسىرۋدىڭ، دەموكراتيالىق باستامالارىمىزدى نىعايتۋدىڭ، ازاماتتاردىڭ ءال-اۋقاتىن كوتەرۋدىڭ جانە قوعامدى بىرىكتىرۋدىڭ ماڭىزدى فاكتورى بولىپ سانالادى. بارشا قازاقستاندىقتارعا شىن كوڭىلدەن بەيبىت ءومىر، تابىس جانە قۇت-بەرەكە تىلەيمىن!» – دەدى ەلباسى.