2017 جىلعى 29 تامىزدا قازاقستان رەسپۋبليكاسى ۇلتتىق مۋزەيىنىڭ كىشى ءماجىلىس زالىندا كونستيتۋسيا كۇنىنە ورايلاستىرىلعان «اتا زاڭ – ەلىمىزدىڭ تۇراقتىلىعىنىڭ نەگىزى» اتتى دوڭگەلەك ۇستەل ءوتتى.

شاراعا ەلىمىزگە بەلگىلى زاڭگەرلەر، تاريحشىلار مەن وزگە دە زيالى قاۋىم وكىلدەرى جانە مۋزەي قىزمەتكەرلەرى قاتىستى. جيىندا ءسوز العان ق ر ارداگەرلەر ۇيىمىنىڭ ورتالىق كەڭەسى ءتوراعاسىنىڭ ءبىرىنشى ورىنباسارى وزعانبايەۆ ءومىرزاق: «ءبىز كونستيتۋسيامىزدى زامان تالابىنا ساي شىنىقتىرۋعا كۇش سالدىق. ءبىراق ول وزگەرتۋلەردىڭ نەگىزىندە باستاپقى كونستيتۋسيامىز تۇردى. سەبەبى بارلىق زاڭنىڭ نەگىزى – اتا زاڭ بولىپ تابىلادى. ەلىمىزدەگى قابىلداناتىن كەز كەلگەن قۇقىقتىق قۇجات كونستيتۋسيامىزدىڭ نەگىزىندە بولادى. ەگەر كونستيتۋسياعا قارسى قانداي دا ءبىر تۇستارى بولاتىن بولسا، ونداي زاڭنىڭ كۇشى جوق دەپ ەسەپتەلىنەدى»، – دەپ كونستيتۋسيانىڭ ماڭىزدىلىعىنا توقتالىپ ءوتتى.  

دوڭگەلەك ۇستەلدىڭ ماقساتى – قازاقستان رەسپۋبليكاسىنىڭ اتا زاڭ باپتارىنداعى رۋحانيات، ادام قۇقىقتارى مەن بوستاندىقتارىنىڭ كەپىلى، قازاقستاندىق ءپاتريوتيزمدى ودان ءارى نىعايتۋ ماسەلەلەرى بويىنشا وي پىكىرلەردى ورتاعا سالۋ.

1993 جىلى 28 قاڭتاردا قازاقستان جوعارعى كەڭەسى تاۋەلسىز ەگەمەندى مەملەكەتتىڭ ءبىرىنشى كونستيتۋسياسىن قابىلدادى. ياعني، حالىققا قىزمەت ەتۋگە شاقىرىلعان جاڭا مەملەكەتتىك ورگانداردىڭ قۇرىلۋى، تاۋەلسىز ەلدىڭ ازاماتتارىنىڭ قۇقىقتارى مەن بوستاندىقتارى، ەگەمەندى قازاقستان مەملەكەتىن نىعايتۋ ماسەلەلەرىنە ۇلكەن ءمان بەرىلدى. الايدا 1993 جىلعى قازاقستان رەسپۋبليكاسىنىڭ كونستيتۋسياسىندا جاڭا مەملەكەتتى دامىتۋ جولىنداعى كەيبىر ماسەلەلەر ەسكەرىلمەگەن ەدى. ناتيجەسىندە قازاقستان رەسپۋبليكاسىنىڭ بۇگىنگى تاڭداعى كونستيتۋسياسى 30 تامىز 1995 جىلى بۇكىلحالىقتىق رەفەرەندۋمدا قابىلداندى. بۇل كۇن مەملەكەتتىك مەرەكە – قازاقستان رەسپۋبليكاسىنىڭ كونستيتۋسيا كۇنى بولىپ سانالادى. مەملەكەتتىڭ نەگىزگى زاڭىنىڭ قابىلدانۋى كونستيتۋسيا جوباسىنىڭ حالىق اراسىندا كەڭ كولەمدە تالقىعا تۇسۋىنە الىپ كەلدى. تالقىلاۋعا 3 ملن-نان استام ازامات قاتىسىپ، 33 مىڭعا جۋىق ۇجىمدىق جوبا قاراستىرىلعان.

كونستيتۋسياعا قابىلدانعاننان بەرى 1998، 2007، 2011 جانە 2017 جىلدارى 4 مارتە وزگەرتۋلەر مەن تولىقتىرۋلار ەنگىزىلدى.