برازيليادا 13 جاستاعى ءجاسوسپىرىم ادام ءولتىرۋ قانداي ەكەنىن ءبىلۋ ءۇشىن ءوزىنىڭ سىنىپتاسىن باۋىزداپ تاستاعان. الايدا ول قىلمىسىن جاساپ بولعاننان كەيىن قاتتى قورقىپ، بارلىق ءمان-جايدى مۇعالىمىنە ايتىپ بەرگەن دەپ حابارلايدى Qamshy.kz اقپارات اگەنتتىگى Life.ru سايتىنا سىلتەمە جاساي وتىرىپ.

وقيعا ەكى وقۋشى بىرگە تۇراتىن ۇيدە ورىن العان. قىلمىسكەردىڭ سىنىپتاسى تاميرەس پاۋلا دە المەيدا ەسىمدى بويجەتكەن ليفت كۇتىپ تۇرعان كەزدە 13 جاستاعى ءجاسوسپىرىم ونى ءورت جاعدايىندا شىعاتىن باسپالداقتارعا سۇيرەپ الىپ كەلگەن. ول قىزدى باسىن قابىرعاعا ۇرىپ ولتىرمەك بولعان، الايدا بۇل ويى ىسكە اسپاپتى. تاميرەستىڭ ءالى ءتىرى ەكەنىن كورگەن بالا پىشاقتى الىپ، مويىن، كوكىرەك جانە قولتىعىنىڭ تۇسىنان 10 رەت پىشاقتاعان. كورشىلەر قىز بالانىڭ ايقايىن ەستىگەننەن سوڭ دەرەۋ داۋىس شىعىپ جاتقان جەرگە كەلىپ، قىزدىڭ ءمايىتىن تاۋىپ العان. ولاردىڭ ىشىندە قىزدىڭ اناسى دا بولعان.

جاسوسپىرىممەن تەرگەۋ جۇرگىزگەن پوليسيا قىزمەتكەرلەرىنىڭ ايتۋىنشا، ول ادام ولتىرگەندە قانداي سەزىمدى باستان كەشىرەتىندىگىن ءبىلۋ ءۇشىن ولتىرگەن. سونىمەن قاتار، قىزدىڭ ولىمىنە وزگە سىنىپتاستارى قالاي قارايتىندىعىن دا بىلگىسى كەلگەن ەكەن. جاس قىلمىسكەر تاعى دا ەكى-ۇش سىنىپتاستارىن ءولتىرىپ، باسكەسەر بولعىسى كەلگەن ەكەن. الايدا بولعان وقيعادان سوڭ ول قورقىپ، بارلىق ءمان-جايدى مۇعالىمىنە ايتىپ بەرىپتى.

«بەتى قىزارىپ كەتكەن، اياق-قولى دىرىلدەپ تۇردى. ول جەدەل جاردەم شاقىرۋىمدى ءوتىنىپ، ءوز ۇيىندە ءبىر قىزدى پىشاقتاپ تاستاعانىن ايتتى. كەيىننەن قان-قان ماتاعا ورالعان پىشاقتى مەنىڭ قولىما ۇستاتتى»، – دەيدى ءمۇعالىم.