يتاليا ۇكىمەتى ەكسپو كورمەسىنە تاڭدالعان تاقىرىپتىڭ مازمۇنى ءۇشىن  قازاقستانعا ىقىلاسىن ءبىلدىردى. ميلانداعى كورمەدە  قازاقستان پاۆيلونى ەڭ ادەمى پاۆيلونداردىڭ ءبىرى بولدى. بۇل كورمە - ازيالىق ەل ۇيىمداستاستىرعان ءتورتىنشى جانە ورتاازيالىق ەل ۇيىمداستىرعان العاشقى ەكسپو كورمەسى. بۇل تۋرالى ەكسپو-2017 حالىقارالىق مامانداندىرىلعان كورمەسىندە يتاليا رەسپۋبليكاسىنىڭ ۇلتتىق كۇنىن مەرەكەلەۋ بارىسىندا يتاليانىڭ ەكونوميكالىق دامۋ ءمينيسترىنىڭ ورىنباسارى يۆان سكالفاروتتو مالىمدەدى. مينيستر ورىنباسارىنىڭ ايتۋىنشا ميلان ەكسپو-2015 جانە استانا ەكسپو-2017 كورمەلەرەنىڭ تاقىرىبى اراسىندا ءوزارا بايلانىس بار جانە ەكى كورمە دە جاھاندىق ماسەلەلەردى شەشۋگە باعىتتالعان، دەپ حابارلايدى Qamshy.kz اقپارات اگەنتتىگى ەكسپو-2017 كورمەسىنىڭ مەديا-ورتالىعىنا سىلتەمە جاساپ.

«قازاقستاندى بولاشاققا ارنالعان وسىنداي قىزىقتى كورمەنى ۇيىمداستىرۋىمەن قۇتتىقتايمىن. كورمە ەلدەرىمىزدىڭ ەكونوميكاسىنا عانا ەمەس، سونداي-اق الەمنىڭ تۇراقتى دامۋىنا دا وزىندىك ىقپال ەتەدى. ەكسپو-2017 كورمەسى الەمدىك شاراعا سەنىممەن قاتىسۋعا شەشىم قابىلداعان قازاقستاننىڭ جانە ونىڭ حالقىنىڭ الەۋەتىن ءجىتى قاراستىرىپ، جاھاندىق دامۋ سالاسىندا جاڭا جەتىستىكتەرگە جەتۋىنە مۇمكىندىك بەرەدى»، - دەپ قورىتىندىلادى يۆان سكالفاروتتو.

ءوز كەزەگىندە قازاقستان رەسپۋبليكاسى ۇلتتىق ەكونوميكا ءمينيسترىنىڭ ورىنباسارى ايباتىر جۇماعۇلوۆ يتاليانىڭ قازاقستاننىڭ سىرتقى ساياساتىندا ماڭىزدى ورىن الاتىنىن، قازاقستاننىڭ ەۋروپالىق ەلدەر اراسىندا بەلسەندى ەكونوميكالىق سەرىكتەسى ەكەندىگىن اتاپ ءوتتى. ەلدەگى ءىرى يتالياندىق كومپانيالاردىڭ بار بولۋى جانە ساۋدا-ەكونوميكالىق ىنتىماقتاستىقتىڭ قارقىندى دامۋى وعان ايقىن دالەل ەكەنىن تىلگە تيەك ەتتى..

 «قازاقستان جانە يتاليا اراسىنداعى ەكى جاقتى قاتىناس تۇراقتىلىق پەن ءوزارا تۇسىنۋشىلىكپەن سيپاتالادى. ەكى ەل قازاقستاندىق-يتالياندىق قاتىناستى جاڭا دەڭگەيگە كوتەرگەن ستراتەگيالىق سەرىكتەستىك جونىندەگى كەلىسىم-شارتقا قول قويدى. مەملەكەتتەرىمىز اراسىندا سەرىكتەستىك قاتىناستى نىعايتا تۇسىرگەن وندىرىستىك جانە ەكونوميكالىق ىنتىماقتاستىق پەن الماسۋ بويىنشا قازاقستاندىق-يتالياندىق ۇكىمەتارالىق جۇمىس توپتارى جەمىستى جۇمىس اتقاردى. وسىلاي قازاقستان مەن يتاليا تاۋار اينالىم كولەمى 2017 جىلدىڭ ءبىرىنشى جارتىجىلدىعىندا 4 ملرد.798،5 ملن. دوللاردى قۇرادى. كورسەتكىش وتكەن جىلمەن سالىستىرعاندا 39% ارتتى(3 ملرد.448،9ملن دولل. سشا)»، - دەدى ۆيسە-مينيستر.

شارانىڭ رەسمي بولىمىنەن كەيىن، قوناقتار يتاليا مادەنيەتىن تاماشالاۋعا مۇمكىندىك الدى. ساحنادا يتالياندىق تانىمال كەرنەيشىلەردىڭ ءبىرى نەللو سالسا ونەر كورسەتتى. اتاقتى مۋزىكانت «كەرەمەت ءومىر»، «سەگىزاياق»، «ءبىر كۇنى امەريكادا»، «ستەندال سيندرومى»، «1+1» سياقتى ءتۇرلى فيلمدەرگە جۇزدەگەن ولەڭدەر جازعان.

سوڭعى جىلدارى يتاليا جاڭارتىلاتىن ەنەرگيا كوزدەرى سالاسىندا وڭ ناتيجەلەرگە قول جەتكىزدى. يتاليا ۇكىمەتى رەسپۋبليكا ءوندىرىسىن ەل ىشىندە جانە شەت ەلدەگى بالامالى ەنەرگيا نارىعىندا كەڭەيتۋدى جوسپارلاۋدا. ەل «ەنەرگەتيكالىق جوبانى» جۇزەگە اسىرۋعا كىرىستى. اتالعان جوباعا سايكەس كالابريا، كامەري، كامپانيا، لومبارديا، پۋليا، پەمونتە، چيريە قالالارى مەن سيسيليا ارالىندا 25 جەل، فوتوگالۆانيكالىق جانە گەوتەرمالدى ازىرلەمەلەرىنىڭ قۇرىلىسى باستالدى.

يتالياندىق پاۆيلون ەكسپو-2017 كورمەسىنىڭ ءىرى پاۆيلوندارىنىڭ ءبىرى بولىپ تابىلادى جانە كورمەگە كەلۋشىلەردى يتالياداعى ەنەرگيا ءوندىرىسىنىڭ سوعىستان كەيىنگى كەزەڭىنەن، CO2 شىعارىلىمدارىنىڭ كولەمىن ازايتۋ، ەنەرگيا تيىمدىلىگىن كوتەرۋ جانە بالامالى ەنەرگيانى دامىتۋ بويىنشا سوڭعى تەحنولوگيالارعا دەيىنگى تاريحى جانە ەۆوليۋسياسىمەن تانىستىرادى.