الماتى وبلىسى ۇشتوبە قالاسىندا الەۋمەتتىك جاعدايى تومەن وتباسىلار ءۇشىن "سابينا" اتتى ەت ساتاتىن الەۋمەتتىك دۇكەن اشىلدى. 

سالتاناتتى ءراسىمدى اۋدان يمامى ءابۋداردان تالاسباي مەن ۇشتوبە قالاسى اكىمدىگىنىڭ باس مامانى گۇلنار كيىكبايەۆا اتقارىپ، اق جاۋلىقتى انالار تاتتىدەن شاشۋ شاشتى.

تاۋىق جانە ءىرى قارا مالدىڭ ەتى ساتىلاتىن دۇكەننىڭ اشىلۋ سالتاناتىنا ۇشتوبەلىكتەر ءبىر كىسىدەي اتسالىستى. الداعى ۋاقىتتا دۇكەندە حالال شۇجىق، تۇشپارا، جارتىلاي فابريكات ونىمدەرىن قامتاماسىز ەتۋ ماقساتىندا شاعىن سەح اشىلماق.

"سابينا" شارۋا قوجالىعىنىڭ باسشىسى قايرات مامىرايەۆتىڭ ايتۋىنشا، بۇل دۇكەندەگى ەت باعاسى وزگە ساۋدا ورىندارىمەن سالىستىرعان ارزان ءارى ساپالى.

"دۇكەن سورەلەرىنە قويىلعان ءىرى قارادان باستاپ، تاۋىق ەتىنە دەيىن ءوزىمىزدىڭ تازا ءونىم. سەبەبى، مالدىڭ ءبارىن ءوزىمىز بورداقىلايمىز. بۇل جۇمىستى بىلتىر قىستان باستاپ قولعا الدىق. شارۋاشىلىقتا 80 باس ءىرى قارا مال بار. قازىرگى تاڭدا قوي مالىن دا بورداقىلۋ ۇستىندەمىز. ەڭ باستىسى حالىق ريزا. قىركۇيەك ايىنىڭ سوڭىنا دەيىن ءدال وسىنداي تاعى دا ءبىر الەۋمەتتىك دۇكەن اشۋدى جوسپارلاپ وتىرمىز"، - دەيدى شارۋاشىلىق باسشىسى.

ارزان ءارى ساپالى ءونىم الۋشىلار قاتارى كۇن سايىن كوبەيمەسە ازايماسى انىق. جەرلەستەرىنە بارىنشا جاقسى جاعداي جاساپ جاتقان كاسىپكەر ەڭبەگىنە تابىس تىلەيمىز.