ءۇندىستاندىق 40 ازامات ەلىمىزدىڭ اۋماعىنان شىعارىلۋى مۇمكىن. مۇنداي شەشىمدى سوت قابىلداۋى ءتيىس. بۇل تۋرالى ىشكى ىستەر ءمينيسترى مالىمدەدى دەپ جازادى Qamshy.kz اقپارات اگەنتتىگى 24.Kz مالىمەتىنە سۇيەنىپ.

قالمۇحانبەت قاسىموۆتىڭ ايتۋىنشا، «ءابۋ دابي پلازا» كەشەنىندەگى جانجالعا ايىپتىلاردىڭ بارلىعى قىلمىستىق جاۋاپكەرشىلىككە تارتىلادى. ولاردىڭ قاتارىندا قازاقستان ازاماتتارى دا بار. كيكىلجىڭگە قاتىسى بار 56 ادام پوليسيا ۋچاسكەسىنە جەتكىزىلگەن. قۇقىق قورعاۋشىلار كوپشىلىگىمەن اڭگىمەلەسىپ، سوسىن ۇيلەرىنە جىبەرگەن.

قالمۇحانبەت قاسىموۆتىڭ مالىمەتىنشە، سول جاعالاۋداعى جانجالعا ءۇندىستان ازاماتتارىنىڭ قاۋىپسىزدىك ەرەجەلەرىن بۇزۋى تۇرتكى بولعان. شەتەل ازاماتتارى تارتىپكە باعىنباي، ارنايى قۇرىلعى ارقىلى وتۋدەن باس تارتقان. جانجالدان كۇزەت قىزمەتكەرى زارداپ شەككەن.

"جانجال شامامەن 19:33 مينۋتتا باستالعان. كۇزەتشىلەر بۇل تۋرالى پوليسياعا 20:05-تە حابارلاعان. كوشەدە تاعى ەكى ءۇندىستان ازاماتىن ۇرىپ-سوققانىن بىلدىك. بۇل شامامەن 20:10 مەن 20:20 ارالىعىندا. ولاردى عيماراتتتىڭ ىشىنەن تاۋىپ الدىق. سوسىن اۋرۋحاناعا جەتكىزىلدى. كەيىن سول ماڭايعا ادامدار جينالا باستادى. ولار تەزىرەك ءمان-جايدى انىقتاۋدى سۇرادى. ولاردى بىردەن جاۋاپكەرشىلىككە تارتۋعا بولار ەدى. ءبىراق ءبىز ولاردىڭ ءىسىن پروكۋراتۋراعا تاپسىردىق. تۇرعىنداردىڭ بۇلايشا شوعىرلانباۋىن وتىنگەن سايىن ولاردىڭ قاتارى كوبەيە بەردى. سوندىقتان 56 ادامدى پوليسيا بولىمشەسىنە جەتكىزۋگە تۋرا كەلدى. ورەسكەل ءتارتىپ بۇزعان 8 ادامعا قاتىستى حاتتاما تولتىرىلىپ، سوتقا جولداندى. 8 ادام اكىمشىلىك جاۋاپكەرشىلىككە تارتىلدى" دەدى قاسىموۆ.