اقتوبەدە قايتىس بولعان سەرىكبولسىن كوشەربايدىڭ اعزالارىن العان دارىگەرلەرگە قاتىستى سوتقا دەيىنگى تەرگەۋ امالدارى توقتاتىلدى دەپ حابارلايدى Qamshy.kz اقپارات اگەنتتىگى "دياپازون"-عا سىلتەمە جاساپ.
«دارىگەرلەردىڭ ارەكەتىن تەكسەرىپ، وعان قۇقىقتىق باعا بەرىلگەننەن كەيىن تەرگەۋ ترانسپلانتاسياعا قاتىستى سۇراقتاردى رەتتەيتىن ەرەجە بۇزىلمادى دەگەن ۇيعارىمعا كەلدى» دەدى اقتوبە وبلىستىق پروكۋراتۋرانىڭ باسشىسى جاسۇلان داۋلەمبايەۆ.
اقتوبە پروكۋراتۋراسى قابىلدانعان شەشىمنىڭ زاڭدى نەمەسە زاڭسىز ەكەنىن تەكسەرىپ جاتىر.
ەستەرىڭىزگە سالا كەتەيىك، دارىگەرلەر ماۋسىم ايىندا قايتىس بولعان 22 جاستاعى سەرىكبولسىن كوشەربايدىڭ تۋىستارىنىڭ رۇقساتىنسىز ونىڭ اعزالارىن الىپ ەكى باسقا ادامعا سالعان. ونىڭ تۋىسقاندارى بۇل تۋرالى تەك ءمايىتحانادا ءبىلدى.
كەيىنىرەك دەنساۋلىق ساقتاۋ مينيسترلىگىنىڭ باسپا ءسوز قىزمەتى «حالىقتىڭ دەنساۋلىعى مەن دەنساۋلىق ساقتاۋ سالاسى» كودەكسىنە سايكەس، تۋىستارى نەمەسە قايتىس بولعان ادام ءتىرى كەزىندە ترانسپلانتاسياعا قارسىمىن دەپ ايتپاسا دارىگەرلەر ونىڭ اعزاسىن الا الاتىنىن حابارلادى.
