8 قىركۇيەك كۇنى قازاق كۇرەسىنەن «الەم بارىسى» تۇيە بالۋاندار اراسىنداعى الەم چەمپيوناتى وتەدى دەپ حابارلايدى Qamshy.kz اقپارات اگەنتتىگى. ەكسپو حالىقارالىق مامانداندىرىلعان كورمەسى اياسىندا ۇيىمداستىرىلىپ وتىرعان بەدەلدى باسەكەگە 40 ەلدىڭ بالۋانى قاتىسادى. شەتەلدىك سپورتشىلارعا قازاقستاننىڭ ءتورت بالۋانى توتەپ بەرەدى.
22 تامىزدان باستاپ قازاق كۇرەسىنەن قازاقستان ۇلتتىق قۇراماسى استانادا وقۋ-جاتتىعۋ جيىنىن وتكىزۋدە. جيىن ناتيجەسى بويىنشا باس جاتتىقتىرۋشى ەرلان ەستەك باستاعان باسپكەرلىك كەڭەس «الەم بارىسىندا» ەل نامىسىن قورعايتىن بالۋانداردى ىرىكتەدى. ولار: ءتورت دۇركىن الەم چەمپيونى جانە قازاقستان بارىسى جەڭىمپازى ايبەك نۇعىماروۆ، الەم چەمپيونى جانە قازاقستان بارىسى ءتۋرنيرىنىڭ جەڭىمپازى مۇحيت تۇرسىنوۆ، جاس تا بولسا، بولاشاعىنان زور ءۇمىت كۇتتىرەتىن ايبات سەيتەن جانە داۋرەن نۇرالينوۆ. سونىمەن قاتار، بيىلعى قازاقستان بارىسى جەڭىمپازى ەلامان ەرعالييەۆ، تانىمال تۇيە بالۋان ەرجان شىنكەيەۆتىڭ قاتىسۋى دا تەك مۇمكىن.
"الەم بارىسى" وسىمەن ەكىنشى رەت وتكەلى تۇر. 2014 جىلى العاشقى تۋرنيرگە 35 ەلدىڭ ءاپايتوس بالۋاندارى قاتىستى. ولاردىڭ اراسىندا دزيۋدودان الەم جانە وليمپيادا چەمپيونى چەx لۋكاش كرپالەك، سامبودان الەم چەمپيونى ارمەنيالىق گاريبيان ارۋتيۋن، دزيۋدودان الەم چەمپيوناتىنىڭ جۇلدەگەرى نەمىس رايمۋند گيردس، كۋراشتان الەم چەمپيونى يزرالدىق گرەگوري رۋدەلسون، الىشتان ازيا چەمپيونى پارسى مۋحامماد تەيموۋري ساراح، وليمپيادا جانە الەم چەمپيوناتىنىڭ جۇلدەگەرى كۋبالىق وسكار رەنە ۆيدال برايسون جانە تاعى باسقا اتاقتى بالۋاندار بوز كىلەمگە شىققان ەدى. تارتىستى باسەكە ناتيجەسىندە التىن بەلبەۋ مەن ءجۇز مىڭ اقش دوللاردى كۋبالىق برايسون يەلەندى. ەكىنشى ورىندا ايبەك نۇعىماروۆ، ءۇشىنشى ساتىدا رەسەيلىك ماكسيم شيريايەۆ. ءۇش جىل بۇرىن xالىقارالىق تۋرنير رەتىندە تۇساۋى كەسىلگەن "الەم بارىسى" بۇگىندە قازاق كۇرەسىنەن ءابسوليۋتتى الەم چەمپيوناتى دەڭگەيىنە ءوستى.
بىرىنشىلىكتىڭ جالپى جۇلدە قورى 30 ميلليون تەڭگە. ونىڭ ىشىندە 15 ميلليونى جەڭىمپازعا تيەسىلى. ءداستۇر بويىنشا، التىن، كۇمىس جانە قولا بەلبەۋلەر دە قاراستىرىلعان. جانكۇيەرلەر دە جۇلدەسىز قالمايدى. كورەرمەندەر اراسىندا Renault Logan اۆتوكولىگى ويناتىلادى.
الەمنىڭ تۇكپىر-تۇكپىرىنەن قاتىسۋشىلار استاناعا كەلە باستادى. بۇگىندە اۆستراليا، جاڭا زەلانديا، جۇڭگو جانە گانا بالۋاندارى ەلورداعا جەتتى. جارىس شارتى بويىنشا، بارلىق قاتىسۋشىلارعا قازاق كۇرەسىنەن ارنالعان سپورتتىق كۇرتەشە مەن اياق كيىم بەرىلۋدە. بالۋاندارعا فوتوسسەسسيا ۇيىمداستىرىلىپ، شەتەلدىك تورەشىلەرگە قازاق كۇرەسىنىڭ ەرەجەلەرى بويىنشا سەمينار وتكىزىلەدى.
