7 قىركۇيەكتە نيدەرلاندتىڭ ساۋدا ميسسياسى الماتىعا باس بۇردى، مۇندا دەلەگاسيانىڭ قازاقستانعا رەسمي ساپارىنىڭ سوڭعى كۇنى وتەتىن بولادى. گوللانديالىقتار استانا مەن تالدىقورعان قالالارىندا بولىپ، جەرگىلىكتى فەرمەرلەر مەن شارۋالارعا ارنالعان جىلىجاي تەحنولوگيالار تىزبەگى بويىنشا سەمينارلار وتكىزدى، جەرگىلىكتى بيلىك وكىلدەرىمەن كەزدەستى، سونداي-اق، قازاقستاندىق قاتىسۋشىلارمەن ەكىجاقتى بيزنەس-كەزدەسۋلەرگە قاتىستى. ساۋدا ميسسياسىنىڭ ماقساتى – ەكى ەل اراسىنداعى اۋىل شارۋاشىلىق سەكتورداعى ىنتىماقتاستىقتى نىعايتۋ.

نيدەرلاند كورولدىگى شاعىن جەر اۋماعى مەن ازداعان حالىق سانىنا قاراماستان، اۋىلشارۋاشىلىق سەكتورىنداعى الەمدىك كوشباسشىلاردىڭ ءبىرى بولىپ تابىلادى. بۇگىنگى كۇنى نيدەرلاند اۋىلشارۋاشىلىق ونىمدەر شىعارۋ كولەمى جاعىنان ەكىنشى ورىندا تۇرعان الەمدىك ەكسپورتشى، سونداي-اق، وسىمدىك شارۋاشىلىعىنداعى كوشباسشى ەل سانالادى.

اۋىل شارۋاشىلىعى – ەكى ەل اراسىنداعى ىنتىماقتاستىقتىڭ كولەم جاعىنان ەكىنشى سالاسى، وسى كەزدە گوللانديانىڭ اۋىلشارۋاشىلىق سالاسىنداعى 40-تان استام كومپانياسى قازاقستانمەن ىنتىماقتاستىق جۇرگىزۋدە. وعان قوسا، 2017 جىلى قازاقستان رەسپۋبليكاسىنىڭ اگروونەركاسىپ كەشەنىن دامىتۋدىڭ 2017-2021 جىلدارعا ارنالعان مەملەكەتتىك باعدارلاماسى قابىلدانعاننان كەيىن گوللانديالىق بيزنەسمەندەر مەن قازاقستاندىق شارۋالار اراسىندا ءوزارا قىزىعۋشىلىق ارتا ءتۇستى. قازاقستانداعى ساۋدا ميسسيالارى نيدەرلاند كورولدىگى ەلشىلىگىمەن جۇيەلى تۇردە وتكىزىلىپ تۇرادى، ءارى ۇلكەن سۇرانىسقا يە.

بيىلعى جىلى ساۋدا ميسسياسىنىڭ ءبىرىنشى ءىس-شاراسى 5 قىركۇيەكتە ەكسپو-2017 الاڭىندا وتكىزىلىپ، 100 فەرمەر مەن اۋىلشارۋاشىلىق سالاسى ماماندارىنىڭ باسىن قوستى. ءىس-شارا بارىسىندا جىلىجاي سەكتورىنىڭ 14 گوللانديالىق كومپانياسى تەحنولوگيالارى تانىستىرىلدى، ولاردىڭ ءبىرقاتارى قازىرگى تاڭدا قازاقستانمەن بەلسەندى تۇردە ىنتىماقتاسىپ جاتىر.

جىلىجاي شارۋاشىلىعىنىڭ تىزبەگى بويىنشا ەكىنشى سەمينار، سونداي-اق وبلىستىق اكىمدىك وكىلدەرىمەن كەزدەسۋ 6 قىركۇيەكتە تالدىقورعاندا بولىپ ءوتتى. ءىس-شاراعا الماتى وبلىسىنىڭ 50 شارۋاسى قاتىستى. كەزدەسۋ اياسىندا اكىمدىك وكىلدەرى جىلىجاي سالاسىنا فەرمەرلەر تاراپىنان قىزىعۋشىلىق ارتقانىن، جانە دە كەيىنگى ىنتىماقتاستىق ءۇشىن ينفراقۇرىلىم مەن جاعدايلاردىڭ بارىن ايتتى.

الماتىداعى اياقتاۋشى جيىن كەزىندە نيدەرلاند كورولدىگىنىڭ ساۋدا ميسسياسى بۇكىلالەمدىك بانك، حالىقارالىق قارجى كورپوراسياسى، ەۋروپالىق قايتا قۇرۋ جانە دامۋ بانكى، ازيالىق دامۋ بانكى مەن الماتى قالاسىنىڭ اكىمدىگى وكىلدەرىمەن كەزەدەسەدى.

قازاقستاندىق جانە گوللانديالىق جەكە سەكتور اراسىنداعى ىنتىماقتاستىق مىسالى رەتىندە قازاقستاندا گوللانديالىق تەحنولوگيا بويىنشا جۇمىس جاسايتىن جىلىجايلار سانىنىڭ ارتىپ جاتقانىن كەلتىرۋگە بولادى. وسىنداي جىلىجاي كەشەندەرىنىڭ ءبىرى بولىپ گوللانديالىق تەحنولوگيا – گيدروپونيكا، ياعني توپىراقسىز، قۇنارلى ەرىتىندىمەن جۇمىس جاسايتىن «BRB APK» (الاتاۋ اۋدانىنىڭ يندۋستريالدىق ايماعى، كوك قاينار شاعىن اۋدانى، الماتى وبلىسى) تابىلادى.

ساراپشىلاردىڭ سوزىنە قاراعاندا، گيدروپونيكادا قورەكتەندىرۋشى زاتتاردى ءسىڭىرۋ اناعۇرلىم تەزىرەك جۇرەدى، ال قوسىمشا وتتەگى تامىر جۇيەسىنىڭ شاپشاڭىراق دامۋىنا سەبەپشى بولادى. بۇل ءادىس قورشاعان ورتاعا اسەر ەتۋىن جانە تىڭايتقىشتاردىڭ توپىراققا تارالۋىن بولدىرمايدى، سونداي-اق، ەنەرگوشىعىندى 30%-عا دەيىن ازايتۋعا مۇمكىندىك بەرەدى.

جىلىجايدىڭ ەكپە كوشەت ءبولىمىن ىسكە قوسۋ 2016 جىلدىڭ قىركۇيەگىندە ورىندالىپ، ءبىرىنشى ەگىن 2016 جىلدىڭ قازان ايىنىڭ سوڭىندا جينالدى. جىلىجايدا تىڭايتقىشتار مەن مينەرالداردى اۆتوماتتى تۇردە بەرۋمەن تامشىلاتىپ سۋارۋ جۇيەسى، ءارى قوسىمشا جارىق بەرۋ، تۇمانداتۋ جانە پەردەلەۋ جۇيەلەرى قولدانىلادى. جوبا قۇنى – 7،2 ملرد.تەڭگە. 1-ماۋسىمدا (2016 ج. قازانىنان 2017 ج. شىلدەسىنە دەيىن) 6،8 مىڭ توننا قىزاناق پەن قيار جينالدى. ءونىم «NAC Agro» وزىندىك برەندىمەن ساتىلۋدا.

2017 جىلعى ساۋدا ميسسياسىنا ءىرى گوللانديالىق كومپانيالار قاتىسۋدا، اتاپ ايتقاندا، ولاردىڭ اراسىندا AltroNova (تۇقىمدار)، Bom Group (دايىن جىلىجايلار كەشەنى)، Celtic Cooling (مۇزداتقىش جانە جەلدەتكىش جابدىقتار)، Certhon (جىلىجاي كەشەندەرى مەن جۇيەلەرى)، Dalsem (جىلىجاي جوبالارىن دايىنداۋ)، Enza Zaden Export B.V. (تۇقىمدار)، Hoogendoorn Growth Management (اۆتوماتتاندىرۋ جۇيەلەرى)، Hortilux Schréder (جىلىجايلارعا ارنالعان جارىقتاندىرۋ)،  Koppert (وسىمدىكتەردى بيولوگيالىق قورعاۋعا ارنالعان قۇرالدار)، Philips Lighting Kazakhstan and Central Asia (جارىق تەحنيكاسى جانە جارىقتاندىرۋ)، Prime Horti Solutions LLP (جىلىجايلار جانە جىلىجايلارعا ارنالعان زاتتار)، Van den Bos Flowerbulbs (گۇل بادانالارى)، Van der Hoeven (اۋىل شارۋاشىلىعىنا ارنالعان دايىن جوبالار) سىندى كومپانيالار بار.