بۇگىن 7 قىركۇيەكتە الماتى قالاسى مەدەۋ اۋداندىق 2-سوتىندا «تريبۋنا. ساياسي قالام» گازەتىنىڭ باس رەداكتورىنىڭ مىندەتىن اتقارۋشى جانبولات مامايدىڭ ىسىنە قاتىستى سوت ۇكىم شىعاردى، دەپ حابارلايدى Qamshy.kz اقپارات اگەنتتىگى. سۋديا ۇكىمىندە قىلمىستىق كودەكستىڭ 193-بابىنىڭ 3-تارماعى بويىنشا جانبولات مامايدى 3 جىلعا باس بوستاندىعىنان شەكتەلىپ، 3 جىل جۋرناليستىك قىزمەتپەن اينالىسۋ قۇقىعىنان ايىرىلعانىن ايتقان. ال سوت مامايدىڭ اقپان ايىنان بەرى 7 اي قاماۋدا وتىرعانىن ەسكەرىپ، ونى 2 جىل 5 اي، 5 كۇنگە باس بوستاندىعىنان شەكتەدى جانە 3 جىل جۋرناليستىك قىزمەتپەن اينالىسۋ قۇقىعىنان ايىرىلدى، ءارى دۇنيە-مۇلكى تاركىلەنەدى.

ازاتتىقتىڭ حابارلاۋىنشا، 6 قىركۇيەك كۇنى جالعاسقان سوت وتىرىسى جانبولات مامايدىڭ سوڭعى سوزىمەن باستالىپ، سونىمەن اياقتالعان.

جۋرناليست سوڭعى سوزىندە وزىنە تاعىلعان ايىپتى مويىندامايتىنىن ايتتى. ونىڭ سوزىنشە، «تريبۋنا. ساياسي قالام» گازەتى ەشكىمنىڭ تاپسىرىسىن ورىنداۋمەن شۇعىلدانباعان، تاۋەلسىز بولعان».

– گازەتتە نە جازۋ كەرەكتىگى تۋرالى ەشكىم نۇسقاۋ بەرە العان جوق. رەداكسيا ساياساتىن وسى گازەتتىڭ قىزمەتكەرلەرى مەن اۆتورلارى عانا انىقتادى. 2012 جىلدان باستاپ قولعا العان جوبانى ۇيىمداستىرۋعا تولەگەن جۇكەيەۆ كومەكتەستى. جاقسىلىق جارىمبەتوۆ اقشالاي كومەكتەسكەنى دە راس. ءبىراق ودان العان كومەگىم زاڭعا قايشى ەمەس بولاتىن. جارىمبەتوۆ ازاماتتىق قوعامدى دامىتۋ ءۇشىن كومەكتەسكىسى كەلدى. مەن ءقازىردىڭ وزىندە جاقسىلىق جارىمبەتوۆكە رەنجىمەيمىن، – دەدى جانبولات ماماي.

مامايدىڭ سوڭعى ءسوزىن ايتىپ بولعان سوڭ سۋديا ۇكىم قىركۇيەكتىڭ 7ء-سى كۇنى جاريالاناتىنىن حابارلاپ، سوت وتىرىسىن اياقتاعان.

ايتا كەتەيىك، "تريبۋنا. ساياسي قالام" گازەتىنىڭ باس رەداكتورى جانبولات ماماي 10 اقپاندا وپپوزيسيالىق ساياساتكەر مۇحتار ءابليازوۆ ۇرلاعان اقشانى زاڭداستىردى دەگەن ايىپپەن تۇتقىندالعان بولاتىن. 2009 جىلدان بەرى ەۋروپادا جۇرگەن، بيىل ماۋسىم ايىندا الماتى سوتى تاراپىنان «بانكتەن اقشا جىمقىردى، قىلمىستىق توپ قۇردى جانە ونى باسقاردى» دەگەن ايىپتارمەن سىرتتاي 20 جىلعا سوتتالعان مۇحتار ءابليازوۆ تا بۇل ايىپتاۋدى «ابسۋرد» دەپ اتاپ، مامايمەن ەشقاشان كەزدەسپەگەنىن مالىمدەگەن.

اقپان ايىنان بەرى ءار كۇنى ءۇمىت پەن كۇدىككە تولى وتكەن جانبولات مامايعا قاتىستى جۇرگىزىلگەن سوت ىسىنە قاتىستى اقپاراتتى Qamshy.kz اقپارات اگەنتتىگى جاريالاعان.