استانا قالاسىنداعى «سارىارقا» ۆەلوترەگىندە قانات يسلام - برەندون كۋك جەكپە-جەگى اياسىنداعى بوكس كەشى جالعاسىپ جاتىر، دەپ جازادى Qamshy.kz.
10 راۋندتان تۇراتىن ءتورتىنشى جەكپە-جەككە 20 بوكسىندا 18 جەڭىسىنىڭ 7ء-سىن نوكاۋت جاساعان امەريكالىق توماس دجاستين بەريلل مەن قانداسىمىز ءالي احمەدوۆ شىقتى.
بارلىق راۋندتاردا جەرلەسىمىز قارسىلاسىنان باسىم ءتۇستى. ءالي احمەدوۆ 6 راۋندتا قارسىلاسىن 2 رەت قۇلاتتى. توماس تا قانشاما سوققى العانىنا قاراماستان ءوزىنىڭ وسال ەمەس ەكەنىن كورسەتتى.
ساعاتبەك مۇساقانوۆتىڭ شاكىرتى ءالي احمەدوۆ الماتى وبىلىسى بورالداي اۋىلىنىڭ شاكىرتى. 2016 جىلى دۋشانبەدە ازيا چەمپيونى اتانعان. ول جاقىندا عانا اقش-تىڭ بۇعان دەيىن جەڭىلمەگەن كەرتيس حيللدى جەڭىپ، اقش-تىڭ وستين قالاسىندا جاستار اراسىنداعى WBC تۇجىرىمى بويىنشا الەم چەمپيونى اتانعان ەدى. ەسكە سالساق، ول وتكەن جىلى 29 قازاندا الماتىدا وتكەن ءتورتىنشى جەكپە-جەگىندە قارسىلاسىن تەحنيكالىق نوكاۋتپەن جەڭدى. ءالي ءازىربايجاندىق قارسىلاسىن ەش قيىندىقسىز سۇلاتىپ سالعان بولاتىن.
ايتا كەتەتىن بولساق، كەشتىڭ العاشقى جەكپە-جەگىن مەيىرىم نۇرسۇلتانوۆ پەن برازيليالىق يسماەل بۋەنو باستاپ، كاسىپقوي رينگتە 3 جەكپە-جەك وتكىزىپ، ەكەۋىن جەڭىسپەن اياقتاعان جەرلەسىمىز العاشقى سەكۋندتاردا-اق، قارسىلاسىن تىقسىرىپ تاستادى.
ەكىنشى بولىپ شارشى الاڭعا كوتەرگەن ديماش نيازوۆ ەدۋاردو پەرەيرا دوس رەيشپەن قولعاپ ءتۇيىستىرىپ، قارسىلاسىن تورەشىلەردىڭ بەرگەن باعاسى بويىنشا 2:1 ۇپاي سانىمەن جەڭدى.
ءۇشىنشى بولىپ شارشى الاڭعا ايدوس ەربوسىن ۇلى مەن ارگەنتينالىق قارسىلاسى شىعا سالا قۋالاپ ءجۇرىپ سابادى.
انونس بەرە كەتسەك، قىركۇيەك ايىندا بۇگىنگى كۇننەن بولەك قازاقستاندىق جانكۇيەرلەردى 16 قىركۇيەكتەگى گولوۆكين مەن الۆارەس اراسىنداعى تاعى ءبىر جەكپە-جەك كۇتىپ تۇر. بۇگىن ەكىنشى رەت اكە اتانعان 35 جاستاعى گولوۆكين الداعى جەكپە-جەگىندە WBC، WBA (Super)، IBF جانە IBO تيتۋلدارىن قورعايدى.
اقش-تىڭ لاس-ۆەگاس قالاسىنداعى 20 مىڭ ورىندىق T-Mobile ارەناسىندا 16 قىركۇيەك كۇنى وتەتىن بوكس كەشتىڭ باستى وقيعاسى بولماق. جەكپە-جەك استانا ۋاقىتىمەن 17 قىركۇيەك، ياعني جەكسەنبىنىڭ تاڭىندا وتەدى. گولوۆكين – الۆارەس بوكس كەشىن ترانسلياسيالاۋعا قۇقىق العان Qazaqstan مەن QazSport تەلەارنالارى تىكەلەي ەفيردە كورسەتەدى. سونداي-اق، اتالعان بوكس 130 ەلدە كورسەتىلەدى.
